Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 163 Hüküm no: 139 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın Atiyetullah Hatun’da olan alacağını tahsil etmesi Şer‘iyyâtçı Efendi’ye teslîm. Ma‘rûz, Bezzâzistânî el-Hâc Mehmed Ağa b. el-Hâc Osman mahfil-i şer‘iyyâtda mukaddemâ kayınvâlidesi İstanbul’da Aksaray kurbünde Koğacıdede mahâllesinde sâkine mu‘arrefetü’z-zât Atiyetullah Hatun bt. Mustafa muvâcehesinde mezbûre Atiyetullah Hatun zimmetinde malımdan ve yedimden bi-safkatin vâhidetin iştirâ ve kabz eylediği üç aded hilâlî koyun sâ‘ati semeninden bin yüz yetmiş guruş alacak hakkım olup hattâ mezbûre Atiyetullah Hatun meblağ-ı merkūm bin yüz yetmiş guruş cihet-i mezkûreden bana zimmetinde sahîhan deyni olduğunu işbu sene-i mübâreke Muharremü’l-haramının dokuzuncu günü ikrâr-ı kat‘î ile ikrâr u i‘tirâf ve târîh-i merkūm ile müverrah karz unvânıyla mu‘anven işbu bir kıt‘a tahvîlî dahi yedime i‘tâ etdikden sonra meblağ-ı merkūm bin yüz yetmiş guruşun sekiz yüz guruşunu işbu meclis-i şer‘de bana edâ ve teslîm edip bâkīsi olan üç yüz yetmiş guruşu dahi çend rûz zarfında bana edâ ve teslîme ta‘ahhüd eylediğinde ben dahi ta‘ahhüdünü kabûl eyledim deyü müdde‘î-i merkūm el-Hâc Mehmed Ağa’nın sâdır olan bi’l-cümle tarkrîr-i meşrûhunu mezbûre Atiyetullah Hatun tasdîk ve tahkīk eylediği tescîl ve mübâşirleri Bâb-ı zabtiye neferâtından Amasyalı Ahmed Ağa kulları yediyle huzûr-ı [âlîlerine i‘lâm olundu]. Fî-selhi C sene [12]74. Es-Seyyid İbrahim.