Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 164 Hüküm no: 140 Orijinal metin no: [28a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saatçi Ebubekir Efendi’nin, boşandığı eşi Ayşe Hatun aleyhindeki alacak iddiasında bulunmaktan men olunması Ayasofyalı Mustafa Çavuş kaydıyla Erzincanlı Hüseyin Çavuş’a teslîm. İstanbul’da Aksaray kurbünde Gurebâ Hüseyin Ağa mahâllesi ahâlîsinden ve sâ‘atçi esnâfından sâhib-i arzuhâl Ebubekir Efendi b. Osman mahfil-i şer‘iyyâtda zevce-i mutallakası derûn-ı arzuhâlde mezkûretü’l-ism mu‘arrefetü’z-zât Âişe Hatun bt. Abdullah muvâcehesinde mezbûre Âişe Hatun’un sadrî kebîr oğlu Ahmed Efendi b. el-Hâc Hüsameddin Efendi hâzır olduğu hâlde mezbûre Âişe Hatun ile mukaddemâ zevciyet beynimizde kāime iken mezbûre Âişe Hatun oğlu hâzır-ı mezbûrun hâl-i suğrunda tesviye-i umûruna kıbel-i şer‘den vasiyy-i mansûbesi olmak takrîbiyle ben mezbûre Âişe Hatun’un bi-şarti’r-rücû‘ emriyle hâzır-ı mezbûra hâl-i suğrunda beher yevm altmışar paradan yedi sene müddetde malımdan medfû‘um olan dört bin yedi yüz seksen guruş ve kezâlik mezbûre Âişe Hatun’un bi-şarti’r-rücû‘ emriyle hâzır-ı mezbûra hâl-i suğrunda âhardan iştirâ ve kabz ve kendüye teslîm eylediğim bâ-defter-i müfredât eşyâ-yı ma‘lûme semenlerine malımdan medfû‘um olan üç bin beş yüz altmış guruş ve yine hâzır-ı mezbûrun hâl-i suğrunda mahrûse-i Bursa’da kâin ma‘lûmü’l-kıt‘a tarlaların müstecirleri yedlerinden icâre-i ma‘lûmelerini tahsîl için on iki ay müddetde kezâlik mezbûre Âişe Hatun’un bi-şarti’r-rücû‘ emriyle malımdan bargir ücreti ve kendi masârıfât-ı lâzıme-i ma‘lûmeme bâ-defter-i müfredât kadr-ı ma‘rûf malımdan harc ü sarf eylediğim on sekiz bin guruş ki cem‘an yirmi altı bin üç yüz kırk guruş ve mezbûre Âişe Hatun mahâlle-i mezbûrede kâin menzilde ve dolabım ve sandığım derûnlarından bi-gayrı hakkın fuzûlî hufyeten ahz ü kabz eylediği mecmû‘u yedi yüz yirmi guruş kıymetli sekiz aded silecek ve altı aded baş havlusu ve bir sarıkın mevcûde ise a‘yânını ve müstehleke ise ba‘de’s-sübût kıymet-i mezkûreleri olan yedi yüz yirmi guruş ve mezbûre Âişe Hatun velîleri olduğum gāibân ani’l-meclis sulbî sagīr oğullarım Osman ve Nuri’nin müşterek mallarından ve benim yedimden karz alıp istihlâk eylediği beş yüz guruş ki min-haysü’l-mecmû‘ mezbûre Âişe Hatun zimmetinde alacak hakkım olan yirmi yedi bin beş yüz altmış guruşu mezbûre Âişe Hatun’dan hâlâ taleb ederim deyü ba‘de’d-da‘vâ ve’l-istintâk mezbûre Âişe Hatun dahi cevâbında müdde‘î-i mezbûr Ebubekir Efendi’nin ber-vech-i muharrer müdde‘âlarını inkâr etmekle müdde‘î-i mezbûr Ebubekir Efendi ber-minvâl-i meşrûh müdde‘âlarını isbâtdan izhâr-ı acz edip talebiyle mezbûre Âişe Hatun bi’l-muvâcehe ber-nehc-i şer‘î tahlîf olunmağın mûcebince müdde‘î-i mezbûr Ebubekir Efendi da‘vâ-i mezkûresiyle mezbûre Âişe Hatun’a bilâ-beyyine mu‘ârazadan men‘ olunduğu huzûr-ı [âlîlerine i‘lâm olundu]. Fî 11 Muharremü’l-haram sene 1274. Mustafa.