Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 165 Hüküm no: 141 Orijinal metin no: [28a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miralay Hüseyin Hüsnü Bey’in vekîli vasıtasıyla damadı Mahmud Efendi aleyhine açmış olduğu alacak davasından vazgeçmesi Mübâşiri hademe-i Âsafî’den İbrahim Ağa’ya teslîm. Mahrûse-i Galata’ya muzâfe kasaba-i Beşiktaş’da Avni Ömer Efendi mahâllesinde sâkin Asâkir-i hâssa-i şâhâne miralayı sâhib-i arzuhâl Hüseyin Hüsnü Bey b. Abdullah b. Abdurrahman tarafından husûs-ı âti’l-beyanda taleb ve da‘vâ ve ahz ü kabza ve lede’l-iktizâ sulh ve ibrâya vekîl olduğu Asâkir-i hâssa-i şâhâne alay imamlarından Ali Efendi b. Ahmed ve yüzbaşılarından İsmail Ağa b. Ahmed nâm kimesneler şehâdetleriyle ber-nehc-i şer‘î sâbit ve sübût-ı vekâletine hükm-i şer‘î lâhık olan Hekimoğlu Ali Paşa Câmi‘-i şerîfi imam-ı evveli Es-Seyyid Abdüllatif Efendi b. Hâfız Mehmed Emin evvelen Salı günü huzûr-ı âlî-i hazret-i Fetvâpenâhî’de ve ba‘dehû bi’t-terâzî mahfil-i şer‘iyyâtda müvekkil-i mûmâ-ileyhin dâmâdı Hazîne-i celîle-i Mâliye’de ketebeden Mahmud Efendi b. Ahmed [28b] muvâcehesinde müvekkil-i mûmâ-ileyh Hüseyin Hüsnü Bey’in mezbûr Mahmud Efendi zimmetinde bin iki yüz yetmiş üç senesi Cumâdelûlâ gurresinde <> mahâlle-i mezkûrede vâki‘ menzilinde malından ve yedi[n]den iktirâz ve kabz ve umûruna sarfla istihlâk eylediği dört bin guruş ve yine malından ve yedinden müşterâ ve makbûz bir aded piştahta semeninden dahi beş yüz guruş ki cem‘an dört bin beş yüz guruş ve sene-i sâbıkā-i mezbûre Şevvâli’l-mükerremi gurresinden işbu sene-i mübâreke Rebî‘ülâhiri gāyetine gelince yedi ay müddetde mezbûr Mahmud Efendi’nin bi-şarti’r-rücû‘ emriyle bâ-defter-i müfredât umûr-ı lâzıme-i ma‘lûmesine müvekkil-i mîr-i mûmâ-ileyhin kendi malından olarak harc ü sarf eylediği üç bin beş yüz guruş ki min-haysü’l-mecmû‘ dâmâdı mezbûr zimmetinde alacak hakkı olan sekiz bin guruşu ben mezbûr Mahmud Efendi’den bi’l-vekâle taleb ederim deyü inkârına mukārin tasaddî eylediğim da‘vâmdan müvekkil-i mîr-i mûmâ-ileyhe izâfetle bi’l-vekâle meccânen fâriğ olup bi’l-cümle husûs-ı mezkûra ve işbu târîh-i i‘lâma gelince sâir cemî‘ hukūk-ı şer‘iyyeye müte‘allıka âmme-i de‘âvî ve kâffe-i mutâlebâtdan ben müvekkilim mûmâ-ileyh Hüseyin Hüsnü Bey’e izâfetle bi’l-vekâle mezbûr Mahmud Efendi’nin zimmetini, ol dahi ber-vech-i meşrûh müvekkilim mûmâ-ileyh Hüseyin Hüsnü Bey’in zimmetini tarafeynden her birimiz ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını asâleten ve vekâleten kabûl edip bu vechile külliyen kat‘-ı münâza‘a eyledik deyü ikrâr ve tasaddîleri tescîl ve huzûr-ı [âlîlerine i‘lâm olundu]. Fî 12 C sene [12]74. el-Hâc İbrahim