Bab Mahkemesi 54 Numaralı Sicil (H. 1102 / M. 1691) cilt: 20, sayfa: 118 Hüküm no: 98 Orijinal metin no: [15b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gevher bt. Musa’dan intikal eden tereke hisselerinin mirasçılar tarafından teslim alındığı Mahmiye-i İstanbul’da Arabacılar mahallesi sâkinelerinden iken bundan [akdem] vefât eden Gevher bt. Musa nâm hâtunun verâseti, zevci Ahmed b. Abdullah ile oğlunun oğlu Süleyman Çelebi b. Ali’ye münhasıra olduğu şer‘an zâhir ve mütehakkik oldukdan sonra mezbûr Süleyman Çelebi meclis-i şer‘-i şerîf-i enverde, müteveffâ-yı mezbûrenin terekesine vâzı‘u’l-yed olan zevc-i metrûku merkūm Ahmed tarafından husûs-ı âti’l-beyâna vekîl olduğu İsmail Çelebi b. İbrahim ve Receb b. Hüseyin şehâdetleriyle şer‘an sâbit olan Mustafa b. el-Hâc Osman mahzarında ikrâr-ı sahîh-i şer‘î ve i‘tirâf-ı sarîh-i mer‘î edip, cedde-i sahîham müteveffâ-yı mezbûrenin Gevher’in terekesinin dört sehmden bir sehmi müvekkil-i mezbûr Ahmed’e ve üç sehmi bana isâbet ve intikāl eylediği lede’ş-şer‘i’l-enver müte‘ayyin olmağla, ben dahi ber vech-i muharrer tereke-i mezbûreden üç sehme isâbet eden on üç bin akçe hissemi müvekkil-i mezbûr bana def‘ ve teslîm, ben dahi yedinden tamâmen ahz u kabz ettiğimden sonra min ba‘d meblağ-ı mezbûr on üç bin akçe hissemden müvekkil-i merkūm Ahmed yedinde ve zimmetinde bir akçe ve bir habbe hakkım kalmadı dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Ali Reis b. Mehmed, Ahmed b. Mehmed, el-Hâc İbrahim b. Abdullah, Ahmed b. el-Hâc Abdullah, İbrahim Çelebi b. Ahmed.