Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 63 Hüküm no: 8 Orijinal metin no: [1b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Ağa b. Abdullah’ın evindeki bazı eşyalarını eşi Emine bt. Hasan’a satması Eşyâ mübâya‘ası nefy-i mülk Mahmiye-i İstanbul’da Mahmud Paşa-yı Velî Câmi‘-i şerîfi kurbünde Kemeraltı sokağında sâkin Halil Ağa b. Abdullah meclis-i şer‘-i şerîf-i enverde zâtı mu‘arrefe hâlâ zevcesi işbu bâ‘isetü’l-vesîka Emine bt. Hasan nâm hatun mahzarında ikrâr-ı tam ve takrîr-i kelâm edip eşyâ-yı memlûkemden yedi minder ve yirmi iki yasdık ve iki ön keçesi ve iki döşek ve beş yorgan ve altı baş yasdığı ve on bir sahan ma‘a kapak ve altı sahan ve bir ta‘âm sinisi ve iki kadayıf tepsisi ve bir kazgan ve bir leğen ma‘a ibrik ve bir âbdest leğeni tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile zevcem mezbûre Emine Hatun’a iki yüz guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr iki yüz guruşu zevcem müşteriye-i mezbûre bana def‘ ü teslîm, ben dahi yedinden tamamen ahz ü kabz ve umûruma sarfla istihlâk eyledim, fîmâ-ba‘d eşyâ-yı muharrere-i mezkûre zevcem mezbûre Emine Hatun’un emvâl-i müşterâsı ve hakk-ı sırfı olup benim kat‘a alâka ve medhalim kalmadığından mâ‘adâ zevcem mezbûre ile mahalle-i mezbûrede vâki‘ ma‘an sâkine olduğum menzil derûnunda mevcûde bi’l-cümle esâs-ı beyt ve melbûsât ve mefrûşât ve evânî-i nühâsiye ve gayr-ı nühâsiyemin mecmû‘u zevcem mezbûre Emine Hatun’un müstakıllen mâlı olup benim üzerime lâbis olduğun köhne libâsımdan gayrı ism-i mâl ıtlâk olunur bir nesnem yokdur dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 18 M sene [1]248 Şühûdü’l-hâl: Berber Musa Ağa b. Halil, İmâm el-Hâc Veliyüddin Efendi, Bezci el-Hâc Mustafa, el-Hâc Hasan b. Osman, Muhzır Fettah Çelebi, Salih Ağa b. ( ), Muhzır Ali Çelebi