Bab Mahkemesi 54 Numaralı Sicil (H. 1102 / M. 1691) cilt: 20, sayfa: 118 Hüküm no: 99 Orijinal metin no: [16a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Panayot’un menzilini Susana bt. Foti’ye satması Mahmiye-i İstanbul’da Çakır Ağa mahallesinde sâkin Yorgi v. Panayot nâm zimmî meclis-i şer‘-i şerîf-i enver ve cânibi’ş-şer‘de işbu bâ‘isetü’l-vesîka Susana bt. Foti nâm nasrâniyye muvâcehesinde ikrâr ve takrîr-i kelâm edip, mahalle-i mezbûrede vâki‘ iki tarafdan Pilaşe nâm nasrâniyye menzili ve bir tarafdan Fonti nâm nasrâniyye menzili ve bir tarafdan işbu kaynanam Todori menzili ile mahdûd bir bâb fevkānî ve bir bâb tahtânî oda ve mezbûr Todori ile müşterek sokak kapusunu müştemil mülk menzilimi, bi cümleti’t-tevâbi‘ ve’l-levâhık bey‘-i bâtt-ı kat‘î ile mezbûre Susana’ya yetmiş beş guruşa bey‘ ve teslîm, ol dahi iştirâ ve kabûl ve tesellüm ettiğinden sonra semeni olan meblağ-ı mezbûr yetmiş beş guruşu yedinden tamâmen ahz u kabz eyledim. Ba‘de’l-yevm menzil-i mezbûrda vechen mine’l-vücûh alâka ve medhalim kalmayıp, Susana’nın mülk-i müşterâsı olmuşdur. Keyfe mâ teşâ ve tahtâr mutasarrıfa olsun dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Cemâziyelevvel sene 1102. Şuhûdü’l-hâl: Yahya Efendi el-imâm, Ahmed Çelebi b. Mehmed, Receb Çelebi el-müezzin, el-Hâc Mehmed b. Süleyman, Osman Efendi b. İsa, Usta Hamza terzi, Müezzin İbrahim Çelebi, Pazarcı Mehmed Çelebi.