Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 64 Hüküm no: 10 Orijinal metin no: [1b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çivici Karabet v. Mihtar’ın Van’ın Şahbağı köyündeki bağını Ohannes v. Vartan’a satması 2300 guruş bağ mübâya‘ası Vilâyet-i Anadolu’da Van kasabasına tâbi‘ Şahbağı karyesi re‘âyâsından olup mahmiye-i İstanbul’da Süleymaniye kurbünde vâki‘ hâlâ Hamîrehâne nâzırı Mehmed Salih Efendi’nin konağında mütemekkin Çivici Karabet v. Mihtar zimmî meclis-i şer‘-i hatîr-i lâzımü’t-tevkīrde işbu hâmilü’r-rakīm Ohannes v. Vartan zimmî muvâcehesinde ikrâr-ı tam ve takrîr-i kelâm edip akd-i âti’z-zikrin sudûruna değin müstakıllen yedimde mülk ve hakkım olup karye-i mezbûrede vâki‘ bir tarafdan Erican zimmî bağı ve bir tarafdan Anton zimmî bağı ve bir tarafdan Şato ve ba‘zan Agob zimmîler bağı ve bir tarafdan tarîk-i âm ile mahdûd tahmînen on iki ırgatlık eşçâr-ı müsmireli kürûmu mülk bağımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mersûm Ohannes zimmîye bin üçyüz guruşa bey‘ ü temlik ve mahâllinde zabta tarafımdan mersûmu taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr bin üç yüz guruşu müşteri-yi mersûm bana def‘ ü teslîm ben dahi yedinden tamamen ve kâmilen ahz ü kabz eyledim, fîmâ-ba‘d bağ-ı mahdûd-ı mezkûr mersûm Ohannes zimmînin mülk-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ ve iskāt ve tarafeynden her birimiz ber-vech-i muharrer âharın ibrâsını kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 24 M sene [1]242 Şühûdü’l-hâl: Muhzır Emin Çelebi, Muhzır Mehmed Çelebi, Muhzır Ali Çelebi, Vartan v. Martık, Bedros Andon, Aci Kirkor v. Avak, Arican v. Mihtar.