Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 65 Hüküm no: 11 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agob v. Karabet’in Van’ın Ala köyündeki bağ hissesini Avanes, Karabet, Mıgırdıç ve Mardıros kardeşlere satması 45 guruş, mübâya‘a Vilâyet-i Anadolu’da Van kazâsı re‘âyâsından olup mahmiye-i İstanbul’da Sultan Bâyezid kurbünde İmâret Hanı’nda mütemekkin Agob v. Karabet zimmî meclis-i şer‘-i hatîr-i lâzımü’t-tevkīrde işbu hâmilü’r-rakīm kendiden asıl ve karındaşları Avanes ve Karabet ve Mıgırdıç evlâd-ı Avadis zimmîler taraflarından husûs-ı âti’l-beyânda tasdîka vekîl-i şer‘îsi Mardıros v. el-mersûm Avadis zimmî muvâcehesinde ikrâr-ı tam ve takrîr-i kelâm edip zikr olunan Van kazâsına tâbi‘ Ala karyesinde vâki‘ bi-tarafdan Sebnatos zimmî bağı ve bir tarafdan Parsih zimmî bağı ve bir tarafdan Avadik zimmî bağı ve bir tarafdan tarîk-i âm ile mahdûd tahmînen kırksekiz hark kürûmu mülk bağ kırk sekiz sehm i‘tibârıyla on iki sehmi benim ve dokuzar sehmden otuz iki sehmi mersûmûn Avanes ve Karabet ve Mıgırdıç ve Mardıros zimmîlerin yedimizde iştirâken ve şâyi‘an mülk ve hakkımız olmağla ben zikr olunan bağ-ı <> mahdûdda olan on iki sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mersûmûn Avanes ve Karabet ve Mıgırdıç ve Mardıros zimmîlere ale’l-iştirâki’s-seviyy kırk beş guruşa bey‘ ü temlik ve mahâllinde zabta tarafımdan mersûmûnu taslît eylediğimde, onlar dahi ber-vech-i muharrer iştirâken iştirâ ve temellük ve kabûl eylediklerinden sonra semeni olan meblağ-ı mezbûr kırk beş guruşu müşteriyyûn-ı mersûmûn bana def‘ ü teslîm, ben dahi yedlerinden tamamen ahz ü kabz eyledim, fîmâ-ba‘d bağ-ı mahdûd-ı mezkûrun mecmû‘u mersûmûn Avanes ve Karabet ve Mıgırdıç ve Mardıros zimmîlerin mülk-i mahzları ve hakk-ı sırfları olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i da‘vâdan her birimiz bi’l-asâle âharın zimmetini ibrâ ve iskāt ve her birimiz ber-vech-i muharrer bi’l-asâle âharın ibrâsını kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 20 M sene [1]242. Şühûdü’l-hâl: Muhzır Ali Çelebi, Muhzır Ebûbekir Çelebi, Muhzır Abdulfettah Çelebi, Hacor, Markar, Kazra, Avanes, (…), Bağdik.