Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 65 Hüküm no: 12 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avrupa tüccarından Mardaris v. Kirkor’un, bezzaz dükkânı gediğini Anton v. Mardıros’a satması 12000 guruş gedik mübâya‘ası Mahrûse-i Galata mahallâtından Kinise mahallesinde mütemekkin Avrupa tüccârından Mardaris v. Kirkor zimmî meclis-i şer‘-i hatîr-i lâzımü’t-tevkīrde işbu hâmilü’r-rakīm Anton v. Ohannes zimmî muvâcehesinde ikrâr-ı tam ve takrîr-i kelâm edip İstanbul’da Aynacılar sûkunda Hakkāklar sokağında çukacı mağazasına muttasıl bir bâb bezzâz dükkânı ve mağazası derûnlarında mevzû‘ beyne’l-esnâf gedik ta‘bîr olunur bâ-kāime müstakıllen yedimde emvâlim olan bir minder ve bir akçe tahtası ve bir sandık ve bir endâze ve bir mikrâs ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mersûm Anton zimmîye on iki bin guruşa bey‘ ü temlik ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr on iki bin guruşu müşteri-yi mersûm bana def‘ ü teslîm ben dahi yedinden tamamen ahz ü kabz eyledim fîmâ-ba‘d âlât-ı muharrere-i mezkûre mersûm Anton zimmînin emvâl-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 25 M sene [1]242 Şühûdü’l-hâl: Muhzır Emin Çelebi, Muhzır Ali Çelebi, Maronak v. Minkad, Aci Mıgırdıç v. Serap, Artin v. Kirkor