Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 66 Hüküm no: 13 Orijinal metin no: [2a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Numan Efendi’nin Anaştaş v. İstefan’a borcu olduğunu ikrar etmesi 15000 guruş, husûs ile ikrâr-ı deyn Tahakkuk-ı özr-i şer‘îye binâen husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan mevlana es-Seyyid Numan Efendi mahmiye-i İstanbul’da Yeni Han’da vâki‘ sarrâf tâifesinden Anaştaş v. İstefan zimmînin odasına varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i Nebevî ettikde oda-i mezkûrda misâfiren sâkin Tosya ahâlisinden mültezim Ebûbekir Ağa b. Hüseyin meclis-i şer‘-i ma‘kūd-ı mezkûrda mersûm Anaştaş zimmî muvâcehesinde ikrâr-ı tam ve takrîr-i kelâm edip benim mersûm Anaştaş zimmî ile beynimizde müddet-i ma‘lûme ahz ü i‘tâ cereyân etmekle biz bi’l-cümle ahz ü i‘tânın hesâbını şühûd muvâcehelerinde sehv ü galatdan ârî rü’yet eylediğimizde iş bu bir kıt‘a ibrâ hücceti nâtıka olduğu üzere benim mersûm Anaştaş zimmîye zimmetimde sahhu’l-bâkī on beşbin guruş deynim zuhûr etmekle meblağ-ı mezbûr on beş bin guruşu mersûm Anaştaş zimmîye zimmetimde vâcibü’l-edâ ve lâzımü’l-kazâ sahîhan deynimdir dedikde gıbbe’t-tasdîki’ş-şer‘î vâki‘ hâli mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 20 M sene [1]242. Şühûdü’l-hâl: Halil Ağa, Mehmed Çelebi el-muhzır, Feyzullah Çelebi el-Muhzır