Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 67 Hüküm no: 15 Orijinal metin no: [2a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Turşucu Osman b. Ahmed’in Emine bt. Seyyid Mustafa’dan aldığı borç karşılığında turşucu gediğini rehin vermesi 575 guruş idâne hücceti Mahmiye-i İstanbul’da Kumkapı kurbünde Nişâncı İbrahim Paşa mahallesinde sâkin Turşuçu Osman b. Ahmed meclis-i şer‘-i şerîf-i enverde zâtı mukır işbu bâ‘isetü’l-vesîka Şerife Emine bt. es-Seyyid Mustafa nâm hatun mahzarında ikrâr-ı tam ve takrîr-i kelâm edip mezbûre Şerife Emine hatun bana malından beş yüz guruş ikrâz ve teslîm, ben dahi yedinden iktirâz ve kabz etmemle meblağ-ı mezbûr ile semeni târih-i <> vesîkadan bir sene tamamına değin müeccel ve mev‘ûd olmak üzere yine mezbûrenin malından ve yedinden iştirâ ve kabz eylediğim bir cild Behcetü’l-fetâvâ kitâbı semeninden yetmiş beş guruş ki <> cem‘an beş yüz yetmiş beş guruş zimmetimde vâcibü’l-edâ ve lâzımü’l-kazâ mezbûre Şerife Emine Hatun’a sahîhan deynim olmağla ben deynim olan meblağ-ı mezbûr beşyüz yetmiş beş guruş mukābelesinde mahalle-i mezbûrede Ekmekçi ve Ermeni kitâbçısı dükkânları beynlerinde vâki‘ bir bâb turşucu dükkânı derûnunda mevcûde Başmuhâsebe Kalemi’nde mukayyed şurût-ı nizâmda dâhil ve mu‘teber ve beyne’l-esnâf gedik ta‘bîr olunur bâ-hüccet-i şer‘iye müstakıllen yedimde emvâlim olan yedi kebîr fıçı ve bir turfanda fıçısı ve beş tahar fıçısı ve bir destgâh ve sâir âlât-ı lâzıme-i ma‘lûmemi mezbûre Şerife Emine Hatun’a rehin vaz‘ ü teslîm eylediğimde ol dahi ber-vech-i muharrer irtihân ve kabz ü kabûl eyledikden sonra mezbûre Şerife Emine Hatun âlât-ı muharrere-i mezkûreyi li-ecli’l-isti‘mâl bana i‘âde ve teslîm, ben dahi yedinden isti‘âre ve kabz etmemle âlât-ı muharrere-i mezkûre yedimde âriyettir dedikde gıbbe’t-tasdîki’ş-şer‘î mâ-vaka‘a [bi’t-taleb ketb olundu.] Fî 25 M sene [1]242 Şühûdü’l-hâl: Ebûbekir Çelebi el-muhzır, Bostânî el-Hâc Halil Efendi, el-Hâc İzzet Ağa, Feyzullah Çelebi el-Muhzır