Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 68 Hüküm no: 16 Orijinal metin no: [2a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Done ve Varteney ile Anna ve eşi Mayer arasındaki alacak davasında anlaşma sağlandığı Ahz, kabz, ibrâ, 3200 guruş Medîne-i Kayseriye sancağında İnce kasabası mahallâtından Salandi mahallesinde mütemekkine iken bundan akdem hâlike olan Savaşidi bt. Todoş Nasrâniyenin verâseti er karındaşı kızları Done ve Varteni bintey Nikola ve li-ebeveyn kız karındaşı oğlu Yorgi v. Nikola zimmîye inhisârı tahakkukundan sonra mersûmetân Done ve Varteni Nasrâniyeler taraflarından husûs-ı âti’l-beyânda vekîl olduğu şahısları bilir Marat v. Dimitri ve Afnad v. Filyos zimmîler şehâdetleriyle sâbit olan Vasil v. Minhad zimmî meclis-i şer‘-i hatîr-i lâzımü’t-tevkīrde işbu hâmilü’r-rakīm kendiden asıl ve zevcesi Anna bt. Adam Nasrâniye tarafından kezâlik husûs-ı âtîde [2b] tasdîka vekîl-i şer‘îsi Mayer v. Anaştaş zimmî muvâcehesinde bi’l-vekâle ikrâr-ı tam ve takrîr-i kelâm edip müvekkilelerim mersûmetânın mûriseleri anaları hâlike-i mersûme sağlığında İstanbul’da Kadırga Limanı kurbünde vâki‘ bir bâb dükkândan mâlike olduğu yirmi sehm hissesini ve kasaba-i mezbûrede vâki‘ ma‘lûmü’l-hudûd bir göz menzilini ve derûnunda mevcûde bâ-defter-i müfredât eşyâ-yı ma‘lûmesi mersûm Mayer zimmîye ve kasaba-i mezbûreye tâbi‘ Köş karyesinde vâki‘ ma‘lûmü’l-hudûd bir kıt‘a kürûmu mülk bağı dahi zevcesi müvekkile-i mersûme Anna Nasrâniyeye bey‘ ü temlik ve her biri vech-i lâyıkı üzere mahallerinde teslîm eylediğinde onlar dahi ber-vech-i muharrer iştirâ ve temellük ve kabz ü kabûl edip ol-vechile emlâk ve eşyâ-i muharrere-i mezbûrede zevcân-ı mersûmânın mülk-i müşterâları ve hakk-ı sırfları olup müvekkilelerim mersûmetânın mûrisleri hâlike-i mersûmenin sağlığında kat‘a alâka ve medhali kalmamış idi. Lâkin ben bu esnâda emlâk ve eşyâ-i muharrere-i mezkûreyi sen ve zevcin mersûme Anna Nasrâniye fuzûlî zabt etmenizle emlâk ve eşyâ-i muharrere-i mezkûreyi ve hâlike-i mersûmenin senin zimmetinde alacağı olan bin guruşu bana teslîm eyle deyü mersûm Mayer zimmîden taleb ve da‘vâya tesaddî ve ol-vechile beynimizde ba‘de vukū‘i’l-münâza‘a el-hâletü hâzihî mersûm Mayer zimmî def‘an li’n-nizâ‘ ve kat‘a li’l-husûme bana malından teberru‘an üç bin iki yüz guruş def‘ ü teslîm ben dahi yedinden ahz ü kabz ve emriyle müvekkilelerim mersûmâtın umûrlarına sarfla istihlâk edip ben husûs-ı mezkûrelere ve hukūk-ı sâire-i şer‘iyeye müte‘allika âmme-i de‘âvî ve kâffe-i mutâlebâtdan mersûm Mayer zimmî ile zevcesi Anna Nasrâniyenin zimmetlerini bi’l-vekâle, ol dahi bana teberru‘an medfû‘u olan meblağ-ı müstehlek-i mezbûrun istirdâdına müte‘allika da‘vâdan benim ve müvekkilelerim mersûmetânın zimmetlerini bi’l-asâle ibrâ ve iskāt ve her birimiz ber-vech-i muharrer âharın ibrâsını bi’l-asâle ve bi’l-vekâle kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 25 M sene [1]242 Şühûdü’l-hâl: Muhzır Emin Çelebi, Muhzır Ebûbekir Çelebi, Muhzır Ali Çelebi, Eci Yuvan v. Kiryako, Togodoş v. Sava, Hamaloğlu Dimitri, Marko v. Yuvan, Bedros v. İstefan, Pavli v. İlya, Espozi v. Kumral, Yorgi v. Sava, Pretamoz v. Lazari, Filyos v. Ligor, Sava v. Estelyas, İlya v. Pretamoz.