Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 69 Hüküm no: 17 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ali Efendi’nin çiftlik ve tarlalarını Osman Ağa’ya satması Çiftlik Mübâya‘ası, 60.000 guruş Mahmiye-i İstanbul’da Süleymaniye kurbünde sâkin sâbıkā Kasabbaşı es-Seyyid Ali Efendi b. el-mezbûr es-Seyyid Ahmed tarafından husûs-ı âti’l-beyânda vekîl olduğu es-Seyyid Mehmed Salih Ağa b. Mehmed Ârif ve Hasan Ağa b. İbrahim şehâdetleriyle sâbit olan es-Seyyid Mehmed Said Efendi b. el-Hâc Halil meclis-i şer‘-i şerîf-i enverde işbu bâ‘isü’l-vesîka Osman Ağa b. Ebîbekir mahzarında bi’l-vekâle ikrâr-ı tam ve takrîr-i kelâm [edip] akd-i âti’z-zikrin sudûruna değin müvekkilim mûmâ-ileyhin bâ-hüccet-i şer‘iye müstakıllen yedinde mülk ve hakkı olup Havâss-ı Refî‘a kazâsına muzâfe Çekmece-i sagīr civârında Alibey karyesinde vâki‘ ma‘lûmü’l-hudûd ve’l-müştemilât Yeşilli Çiftliği demekle arîf bir bâb mülk çiftlik ve derûnunda mevcûde bâ-defter-i müfredât eşyâ-yı ma‘lûme ve âlât-ı çift ve hubûbât ve hayvanâtı ve Tahtakale Çiftliği demekle meşhûr müştemilât-ı ma‘lûmeyi tarafeyenden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm Osman Ağa’ya on bin guruşa bi’l-vekâle bey‘ ü temlik ve sâlifü’l-beyân çiftlikâta teba‘iyet ile zirâ‘at ve hırâset olunur mevâzi‘-i adîdede kâin her biri lede’l-ahâli ve’l-cîrân ma‘lûmü’l-hudûd ve’l-kıt‘a tarlalar dahi müvekkilim mûmâ-ileyhin bâ-tapu taht-ı tasarrufunda olmakla ben zikr olunan tarlaları dahi elli bin guruş bedel mukābelesinde bâ-ma‘rifet-i sâhib-i arz ferâğ ve tefvîz ve mahâllinde teslîm eylediğimde ol dahi ber-vech-i muharrer iştirâ ve temellük ve tefevvüz ve kabûl eyledikden sonra semen ve bedel cem‘an altmış bin guruşu müşteri-yi merkūm bana def‘ ü teslîm ben dahi yedinden bi’l-vekâle tamamen ahz ü kabz eyledim, fîmâ-ba‘d çiftlikât ve bâ-defter-i müfredât eşyâ-yı ma‘lûme ve âlât-ı çift hayvanât ve hubûbât merkūm Osman Ağa’nın mülk ve emvâl-i müşterâ ve hakk-ı sırfı olup ve zikr olunan tarlalar dahi dâhil-i havza-i tasarrufu olup müvekkilim mûmâ-ileyhin kat‘a alâka ve medhali kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini bi’l-asâle ve bi’l-vekâle ibrâ ve iskāt ve her birimiz ber-vech-i muharrer âharın ibrâsını bi’l-asâle ve bi’l-vekâle kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî-Selhi Zilhicceti’ş-şerîfe sene [1]242 Şühûdü’l-hâl: Muhzır Hüseyin Çelebi, Muhzır Emin Çelebi, Muhzır Ali Çelebi, Muhzır Genç Mehmed Çelebi, Muhzır Ebûbekir Çelebi