Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 71 Hüküm no: 19 Orijinal metin no: [2b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avadik ve ortağı Merican’ın Sahak’a borçları olduğunu ikrar etmeleri İdâne hücceti, 650 guruş Havâss-ı refî‘a kazâsına muzâfe kasaba-i Hasköy’den mütemekkinlerinden Avadik v. Artin ve şerîki Merican v. Avadik zimmîler meclis-i şer‘-i hatîr-i lâzımü’t-tevkīrde işbu hâmilü’r-rakīm Sahak v. Mıgırdıç zimmî muvâcehesinde ikrâr-ı tam ve takrîr-i kelâm edip mersûm Sahak zimmî her birimiz âharın zimmetine lâzım gelen meblağa kefîl ve zâmin olmak üzere bize mâlından beş yüz guruş idâne ve teslîm biz dahi yedinden istidâne ve kabz edip meblağ-ı mezbûr beş yüz guruş ile semeni târih-i kitâbdan iki sene tamamına değin müeccel ve mev‘ûd olmak üzere yine her birimiz âharın zimmetine lâzım gelen meblağa kefîl ve zâmin olmak üzere mersûm Sahak zimmînin malından ve yedinden iştirâ ve kabz eylediğimiz bir hilâlî sâ‘at semeninden yüz elli guruş ki ciheteyn-i mezkûreteynden cem‘an altı yüz elli guruş zimmetimizde mersûm Sahak zimmîye vâcibü’l-edâ ve lâzımü’l-kazâ deynimiz olmağla biz deynimiz olan meblağ-ı mecmû‘-ı mezbûr altı yüz elli guruş mukābelesinde mahmiye-i İstanbul’da Küçükpazar’da Parmaklıkçı Mehmed Emin Ağa’nın menzili tahtında kâin bir bâb berber dükkânı derûnunda mevcûde beyne’l-esnâf gedik ta‘bîr olunur ale’l-iştirâki’s-seviyy yedimizde emvâlimiz olan sekiz ustura ve iki kayış ve bir kazgan ve iki ayna ve iki mikrâs ve iki tas ve sâir âlât-ı lâzıme-i ma‘lûmeyi <> mersûm Sahak zimmîye rehin vaz‘ ü teslîm eylediğimizde ol dahi ber-vech-i muharrer irtihân ve kabz ü kabûl eyledikden sonra mersûm Sahak zimmî âlât-ı lâzıme-i ma‘lûmeyi li-ecli’l-isti‘mâl bize icâre ve teslîm biz dahi yedinden isti‘âre ve kabz etmemizle âlât-ı muharrere-i mezkûre hâlâ yedimizde âriyettir dediklerinde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 5 M sene [1]242 Şühûdü’l-hâl: Muhzır Emin Çelebi, Kethudâ İbrahim Ağa, Şeyh el-Hâc Musa Efendi, Du‘âcı el-Hâc İsmail Efendi, Yiğitbaşı Seyyid Nuri Ağa, Çavuş Mustafa Efendi, Muhzır Ali Çelebi