Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 71 Hüküm no: 20 Orijinal metin no: [2b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Mehmed Efendi’nin Kolancı gediği hissesini kızı Saliha Hatun’a satması Kolancı Gediği Mahrûse-i Galata’ya muzâfe kasaba-i Beşiktaş’a tâbi‘ Dolmabahçe kurbünde Süleymâniye mahallesinde sâkin Hafız Mehmed Efendi b. Hüseyin tarafından husûs-ı âti’l-beyânda ikrâra vekîl olduğu Ahmed Efendi b. el-Hâc Ali ve Mehmed Beşe b. Musa şehâdetleriyle sâbit olan Hasan Efendi b. Mustafa meclis-i şer‘-i şerîf-i enverde sulbiye-i kebîre kızı zâtı mu‘arrefe işbu bâ‘isetü’l-vesîka Saliha Hatun mahzarında ikrâr-ı tam ve takrîr-i kelâm edip müvekkilim mezbûr Hafız Mehmed Efendi mahmiye-i İstanbul’da bezzâzistân-ı atik kurbünde Kolancılar sûkunda vâki‘ kılâbdâncı Mehmed ve kılâbdâncı İdon zimmî dükkânları beynlerinde kâin bir bâb kolan dükkânı derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzıme-i ma‘lûmenin nıfs-ı şâyi‘leri benim ve nısf-ı âharları karındaşım Ali Ağa’nın yedimizde irsen emvâlimiz olmağla ben âlât-ı muharrere-i mezkûrede ber-vech-i muharrer mâlik olduğum nısf hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîk kızım mezbûre Saliha Hatun’a bin iki yüz guruşa bey‘ ü temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr bin iki yüz guruşu müşteriye-i mezbûre Saliha Hatun bana def‘ ü teslîm, ben dahi yedinden tamamen ahz ü kabz eyledim. Fîmâ-ba‘d âlât-ı muharrere-i mezkûrenin nısfları kızım mezbûre Saliha Hatun’un emvâl-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan herbirimiz âharın zimmetini ibrâ ve iskāt ve her birimiz ber-vech-i muharer âharın [3a] ibrâsını kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî-selhi Zilka‘de sene [1]241 Şühûdü’l-hâl: Muhzır Ali Çelebi, Muhzır Emin Çelebi, Muhzır Fettah Çelebi,