Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 72 Hüküm no: 21 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Mehmed’in bazı ev eşyalarını eşi Hasan Ağa’ya satması Eşyâ mübâya‘ası, 300 guruş Mahmiye-i İstanbul’da Ahırkapı dâhilinde es-Seyyid Hasan mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe Şerife Hadice bt. Mehmed nâm Hatun meclis-i şer‘-i şerîf-i enverde hâlâ zevci işbu bâ‘isü’l-vesîka Hasan Ağa b. Hasan mahzarında ikrâr-ı tam ve takrîr-i kelâm edip eşyâ-yı memlûkemden üç minder ve üç çit mak‘ad, altı yasdık ve iki yorgan ve iki baş yasdığı ve iki yüz yasdığı ve dört tencere ma‘a kapak ve bir mangal ve yedi tencere ve üç kapak ve bir şalî entari ve bir basma entarim tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile zevcim mezbûr Hasan Ağa’ya üç yüz guruşa bey‘ vetemlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr üç yüz guruş mutâlebesine müte‘allika âmme-i da‘vâdan zevcim mezbûr Hasan Ağa’nın zimmetini ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl edip fîmâ-ba‘d eşyâ-yı muharrere-i mezkûre zevcim mezbûr Hasan Ağa’nın emvâl-i müşterâsı ve hakk-ı sırfı olup benim kat‘a alâka ve medhalim kalmadığından mâ‘adâ mahalle-i mezbûrede vâki‘ zevcim mezbûr ile ma‘an sâkin olduğum menzil derûnunda mevcûde bi’l-cümle esâs-ı beyt-i mefrûşât ve melbûsât ve evânî-i nühâsiye ve gayr-ı nühâsiyenin mecmû‘u zevcim mezbûr Hasan Ağa’nın emvâli olup benim üzerime lâbise olduğum köhne libâsımdan gayrı ism-i mâl ıtlâk olunur bir nesnem yokdur dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 14 M sene [1]242 Şühûdü’l-hâl: İmâm-ı mahalle Mehmed Sadık Efendi, Saraçhâne İmâmı es-Seyyid Ahmed Efendi, Mehmed Ağa b. İsmail, Bekçi el-Hâc Mehmed Ağa, İbrahim Çelebi el-muhzır