Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 73 Hüküm no: 22 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Mehmed’in menzilini eşi Hasan Ağa’ya satması Menzil mübâya‘ası, 300 guruş. Mahmiye-i İstanbul’da Ahırkapı dâhilinde es-Seyyid Hasan mahallesinde sâkine zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe Şerife Hadice bt. Mehmed nâm hatun meclis-i şer‘-i şerîf-i enverde hâlâ zevci işbu bâ‘isü’l-vesîka Hasan Ağa b. Hasan mahzarında ikrâr-ı tam ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye yedimde müstakıllen mülküm ve hakkım olup mahrûse-i Galata’ya muzâfe kasaba-i Beşiktaş’da Maçka nâm mahâlde vâki‘ bir tarafdan Bekçi Mehmed Ağa menzili ve bir tarafdan Manav Halil Beşe menzili ve bir tarafdan dere ve taraf-ı râbi‘i tarîk-i âm ile mahdûd bir oda ve bir sofa ve bir mikdâr eşcâr-ı mütenevvi‘a ve bir bi’r-i mâ ve bir sofayı müştemil bağçe ve sokak kapısını hâvî bir bâb mülk menzilimi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile zevcim mezbûr Hasan Ağa’ya üç yüz guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr üç yüz guruş mutâlebesine müte‘allika âmme-i da‘vâdan zevcim mezbûr Hasan Ağa’nın zimmetini ibrâ ve iskāt eyledim. Fîmâ ba‘d menzil-i mahdûd-ı mezkûr mezbûr Hasan Ağa’nın mülk-i müşterâsı ve hakk-ı sırfı olup benim kat‘a alâka ve medhalim kalmamışdır dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 14 M sene [1]242 Şühûdü’l-hâl: İmâm-ı mahalle Mehmed Sadık Efendi, Saraçhâne İmâmı es-Seyyid Ahmed Efendi, Mehmed Ağa b. İsmail, Bekçi el-Hâc Mehmed Ağa, İbrahim Çelebi el-muhzır