Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 75 Hüküm no: 25 Orijinal metin no: [3a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Ömer’in bazı ev eşyalarını Hatice bt. Abdullah’a satması Eşyâ mübâya‘a, 250 guruş, hibe 1500 guruş Husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan Boluvîzâde müderrisîn-i kirâmdan mevlana es-Seyyid Mehmed Esad Efendi mahmiye-i İstanbul’da Sultan Ahmed kurbünde Helvacıbaşı İskender Ağa mahallesinde vâki‘ Mehmed Paşa tekyesi Şeyhi es-Seyyid Mustafa Efendi b. eş-Şeyh es-Seyyid Hüseyin Efendi’nin menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i âlî ettikde menzil-i mezkûrda müsâfereten sâkine ve zâtı <> Müslimûn-ı merkūmûn ta‘rîfleriyle mu‘arrefe olan Hadice bt. Ömer b. Abdullah nâm hatun meclis-i ma‘kūd-ı mezkûrda kezâlik zâtı mu‘arrefe işbu bâ‘isetü’l-vesîka diğer Hadice bt. Abdullah nâm hatun mahzarında ikrâr-ı tam ve takrîr-i kelâm edip eşyâ-yı memlûkemden üç minder ve iki döşek ve bir şilte ve bir çârşeb ve altı köhne yasdık ve bir yorgan ma‘a çârşeb ve iki tencere ma‘a kapak ve üç sahan ma‘a kapak ve bir güğüm ve bir kadayıf tepsisi ve bir leğen ma‘a ibrik ve bir mangal ve dört entari ve iki şalvar ve bir çuka ferâcemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mezbûre diğer Hadice Hatun’a yüz elli guruşa bey‘ ü temlik ve yine malımdan nakid bin beş yüz guruşum dahi mezbûre diğer Hadice Hatun’a hibe-i sahîha-i şer‘iye ile hibe ve temlik ve teslîm eylediğimde ol dahi ber-vech-i muharrer iştirâ ve meclis-i hibede ittihâb ve temellük ve tesellüm ve kabz ü kabûl eyledikden sonra semeni olan meblağ-ı mezbûr [iki] yüz elli guruşu mezbûre diğer Hadice Hatun bana def‘ ü teslîm ben dahi yedinden tamamen ahz ü kabz ve umûruma sarfla istihlâk eyledim, fîmâ-ba‘d eşyâ-yı muharrere-i mezkûre mezbûre diğer Hadice Hatun’un emvâl-i müşterâsı ve nakd-i mezkûr dahi mâl-ı mevhûbu olup benim kat‘a alâka ve medhalim kalmadığından mâ‘adâ işbu akd-i meclis olunan menzil derûnunda mevcûde bi’l-cümle esâs-ı beyt ve melbûsât ve mefrûşât ve evânî-i nühâsiye ve gayr-ı nühâsiyenin mecmû‘u mezbûre diğer Hadice’nin malı olup benim üzerime lâbise olduğum köhne libâsımdan gayrı ism-i mâl ıtlâk olunur [3b] bir nesnem yokdur dedikde gıbbe’t-tasdîki’ş-şer‘î vâki‘ hâli mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 5 Zilhicceti’ş-şerîfe sene 1241 Şühûdü’l-hâl: Es-Seyyid eş-Şeyh Osman Efendi, es-Seyyid Zeynelabidin, es-Seyyid Hasan Ağa, el-Hâc Mehmed Emin Efendi, Muhzır İsmail Çelebi