Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 76 Hüküm no: 26 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çavuş’un bazı ev eşyasını eşi Hatice bt. Abdullah’a satması Eşyâ mübâya‘ası, nefy-i mülk, 250 guruş Mahmiye-i İstanbul’da Şehzâde Câmi‘-i şerîfi kurbünde Molla Hüsrev mahallesinde sâkin Mustafa Çavuş b. Ahmed meclis-i şer‘-i şerîf-i enverde hâlâ zevcesi zâtı mu‘arrefe işbu bâ‘isetü’l-vesîka Hadice bt. Abdullah nâm hatun mahzarında ikrâr-ı tam ve takrîr-i kelâm edip eşyâ-yı memlûkemden bir kaliçe seccâde ve beş çatma yasdık ve dört minder ve iki beylik ve bir orta keçesi ve bir kilim ve bir beledî döşek ve bir çit şilte ve iki basma yorgan ma‘a çârşeb ve dört Kıbrıs yorgan ma‘a çârşeb ve def‘a bir çit tennûr yorganı ve def‘a bir çit sagīr yorgan ve beş döşek çârşebi ve beş çit baş yasdığı ve dört sagīr minder ve dört şayak ve beledî yasdık ve bir ayna ve üç sagīr ve kebîr sini ve iki kadayıf tepsisi ve iki nühâs mangal ma‘a tahta ve bir güğüm ve bir kara güğüm ve iki leğen ma‘a ibrik ve beş sagīr ve kebîr tencere ve on beş sahan ma‘a kapak ve üç şorba tası ve bir nühâs takaduka ve bir kebîr lenger ve dört sagīr ve kebîr şamdan ve iki âbdest leğenim tarafından îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile zevcem mezbûre Hadice Hatun’a iki yüz elli guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr iki yüz elli guruşu bana def‘ ü teslîm ben dahi yedinden tamamen ahz ü kabz ve umûruma sarfla istihlâk eyledim, fîmâ-ba‘d eşyâ-yı muharrere-i mezkûre mezbûre Hadice Hatun’un emvâl-i müşterâsı ve hakk-ı sırfı olup benim kat‘a alâka ve medhalim kalmadığından mâ‘adâ mahalle-i mezbûrede vâki‘ mezbûre Hadice Hatun ile ma‘an sâkin olduğumuz menzil derûnunda mevzû‘ bi’l-cümle esâs-ı beyt ve melbûsât ve mefrûşât ve evânî-i nühâsiye ve gayr-ı nühâsiyenin mecmû‘u mezbûre Hadice Hatun’un malı olup benim üzerime lâbis olduğum köhne libâsımdan gayrı ism-i mâl ıtlâk olunur bir nesnem yokdur dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 25 Rebî‘ülevvel sene 1241 Şühûdü’l-hâl: Kahveci Osman Ağa, Hasan Efendi b. Veliyüddin, Muhzır Hüseyin Çelebi, Ömer Efendi b. Mustafa, Çukadâr Osman Ağa, Fincancı es-Seyyid Mustafa Efendi b. Ahmed, Haseki Mustafa Ağa, Canbaz Hasan Ağa b. Hüseyin Ağa, Muhzır İbrahim Çelebi.