Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 77 Hüküm no: 27 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tatar Musa’nın vefat eden kızı Zekiye’nin mirasından hissesine isabet eden miktarı damadı Ömer Ağa’dan teslim alması Ahz ü kabz, 1174 guruş Mahmiye-i İstanbul’da Elvanzâde mahallesinde sâkine iken bundan akdem fevt olan Zekiye bt. Tatar Musa b. Derviş Mehmed’in verâseti zevc-i metrûku Ömer Ağa b. Ömer ile babası merkūm Tatar Musa’ya münhasıra ve terekesinin nısfı zevc-i merkūma ve nısf-ı âharı babası merkūma isâbeti tahakkukundan sonra merkūm Musa Ağa meclis-i şer‘-i şerîf-i enverde tereke-i müteveffiye-i mezbûreye vaz‘-ı yedi mütehakkık olan işbu bâ‘isü’l-vesîka zevc-i merkūm Ömer Ağa mahzarında bi’l-verâse ikrâr-ı tam ve takrîr-i kelâm edip mûrisimiz müteveffiye-i mezbûrenin zevci merkūm zimmetinde mütekarrir ve ma‘kūdün-aleyh olan beş yüz beş guruş mehr-i müecceli ve tereke-i mebî‘ası esmânı olan bin sekiz yüz kırk üç guruş ki cem‘an iki bin üç yüz kırk sekiz guruşu beynimizde iktisâm ve her birimizin hisse-i irsiyemize isâbet eden bin yüz yetmiş dört guruşu ahz ü kabz edip min-ba‘d meblağ-ı mezbûr bin yüz yetmiş dört guruşdan dâmâdım merkūm zimmetinde bir akçe ve bir habbe bâkī kalmamağla mûrisimiz müteveffiye-i mezbûrenin kalîl ü kesîr celîl ü hakīr nukūd ve urûz akār ve menkūl, ma‘lûm ve mechûl bi’l-cümle ism-i mal ıtlâk olunur terekesine ve hukūk-ı mîrâsa ve sâire müte‘allika âmme-i da‘vâdan her birimiz âharın zimmetini bi’l-verâse ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 2 Ş sene 1241 Şühûdü’l-hâl: Mehmed Emin Ağa b. Ömer, İsmail Ağa b. Mehmed, Mahmud Ağa b. İbrahim, İsmail Ağa b. Zekeriya, Veliyüddin Ağa, Muhzır Emin Çelebi, Muhzır Genç Mehmed Çelebi.