Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 78 Hüküm no: 29 Orijinal metin no: [3b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Eyüb Ağa’nın berber gediğini Ümmügülsüm ile eşi Mustafa Ağa’ya satması Berber Gediği Mahmiye-i İstanbul’da Saraçhâne kurbünde sâkin Kapan-ı dakīk tüccârlarından el-Hâc Eyüb Ağa b. Mehmed b. Abdullah tarafından husûs-ı âti’l-beyânda ikrâra vekîl olduğu Osman Ağa b. Mehmed Emin ve Bezzâzistânî İbrahim Ağa b. Hüseyin şehâdetleriyle sâbit olan el-Hâc Mustafa Ağa b. İbrahim meclis-i şer‘-i şerîf-i enverde işbu bâ‘iseyü’l-vesîka kendiden asıl ve zevcesi Ümmügülsüm bt. Mehmed Emin tarafından husûs-ı âtîde tasdîka vekîl-i şer‘îsi Mustafa Ağa b. Halil mahzarında ikrâr-ı tam ve takrîr-i kelâm edip müvekkilim merkūm el-Hâc Eyüb Ağa mahmiye-i mezbûrede Tavukpazarı kurbünde beytü’l-mâl odası sûkunda iki bâb kahve dükkânları beynlerinde kâin beher şehr beş guruş mülk kirâlı bir bâb berber dükkânı derûnunda mevcûde beyne’l-esnâf gedik ta‘bîr olunur müstakıllen yedimde emvâlim olan bir kazgan ve bir mangal ve beş ustura ve bir bileği taşı ve bir kayış ve bir cınbız ve bir mikrâs ve bir leğen ve bir çekmece ve iki peşkir ve dört havlu ve sâir âlât-ı lâzıme-i ma‘lûmenin rub‘unu müvekkile-i mezbûre Ümmügülsüm Hatun’a iki yüz elli guruşa ve sülüs-i erba‘ını dahi vekîl-i mezbûr el-Hâc Mustafa Ağa’ya yedi yüz elli guruşa bey‘ ü temlik ve vech-i lâyıkı üzere teslîm eylediğimde onlar dahi ber-vech-i muharrer iştirâ ve temellük ve tesellüm ve kabz ü kabûl eylediklerinden sonra semeni olan meblağ-ı mecmû‘-ı mezbûr bin guruşu müşteriyân-ı merkūmân bana def‘ ü teslîm ben dahi yedlerinden tamamen ahz ü kabz eyledim. Fîmâ ba‘d âlât-ı muharrere-i mezkûrenin rub‘u mezbûre Ümmügülsüm Hatun’un ve sülüs-i erba‘ı dahi merkūm Mustafa Ağa’nın emvâl-i müşterâları ve hakk-ı sırfları olup benim kat‘a alâka ve medhalim kalmamışdır dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 15 Şevvâl sene 1240 Şühûdü’l-hâl: Sarrâc İsmail Ağa, el-Hâc İsmail Ağa, es-Seyyid Ahmed b. Ali, Muhzır Ali Çelebi ve gayruhum.