Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 79 Hüküm no: 30 Orijinal metin no: [3b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenci Fatıma’nın bazı ev eşyasını Havva bt. Mehmed’e satması Eşyâ mübâya‘ası, 50 guruş Mahmiye-i İstanbul’da Nuruosmaniye kurbünde Bodrum sûkunda sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Zenciye Fatıma bt. Abdullah nâm hatun meclis-i şer‘-i şerîf-i enverde kezâlik zâtı mu‘arrefe işbu bâ‘isetü’l-vesîka Havva bt. Mehmed nâm hatun mahzarında ikrâr-ı tam ve takrîr-i kelâm edip eşyâ-yı memlûkemden mecmû‘u köhne olarak iki minder ve beş yasdık ve bir döşek ve bir yorgan ve bir baş yasdığı ve beş sahan ma‘a kapak ve iki tencere ve bir leğen ma‘a ibrik ve bir şamdanımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mezbûre Havva Hatun’a elli guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr [4a] elli guruş mutâlebesine ve husûs-ı mezkûre müte‘allika da‘vâdan tarafeynden her birimiz aharın zimmetini ibrâ ve iskāt ve her birimiz âharın ibrâsını kabûl eylediğimizden mâ‘adâ sokak-ı mezbûrda vâki‘ sâkine olduğum menzil derûnunda mevcûde bi’l-cümle esâs-ı beyt ve melbûsât ve mefrûşât ve evânî-i nühâsiye ve gayr-ı nühâsiyenin mecmû‘u mezbûre Havva Hatun’un malı olup benim üzerime lâbis olduğum köhne libâsımdan gayrı ism-i mâl ıtlâk olunur bir nesnem yokdur dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 9 Rebî‘ülâhir sene 1240 Şühûdü’l-hâl: Molla Hüseyin el-muhzır, Ali Çelebi el-muhzır, Mehmed Çelebi el-muhzır, Hüseyin Ağa b. Ali, Mustafa Ağa b. el-Hâc Ömer