Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 79 Hüküm no: 31 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. İbrahim’in menzil, harman ve bostan yerini Seyyid Hacı Hasan’a satması Emlâk mübâya‘ası, 215 guruş Vilâyet-i Anadolu’da Bolu sancağında Elemen karyesi ahâlisinden olup mahmiye-i İstanbul’da Sultan Bâyezid-i Velî Câmi‘-i şerîfi kurbünde sâkin İbrahim b. İbrahim meclis-i şer‘-i şerîf-i enverde işbu bâ‘isü’l-vesîka es-Seyyid el-Hâc Hasan Beşe b. Osman mahzarında ikrâr-ı tam ve takrîr-i kelâm edip müstakıllen yedimde mülk ve hakkım olup karye-i mezbûrede vâki‘ ma‘lûmü’l-hudûd iki bâb mülk menzil yeri ve samanhâne yeri ve ma‘lûmü’l-hudûd harman yeri ve ma‘lûmü’l-hudûd bir kıt‘a bostan yerimi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm es-Seyyid el-Hâc Hasan Beşe’ye iki yüz on beş guruşa bey‘ ü temlik ve mahâllinde zabta tarafımdan merkūmu taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr iki yüz on beş guruşu müşteri-yi merkūm bana def‘ ü teslîm ben dahi yedinden tamamen ahz ü kabz eyledim, fîmâ-ba‘d emlâk-ı muharrere-i mezkûre merkūm es-Seyyid el-Hâc Hasan Beşe’nin emlâk-ı müşterâsı ve hakk-ı sırfı olup benim kat‘a alâka ve medhalim kalmamışdır dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 4 Zilka‘de sene 1241. Şühûdü’l-hâl: Hasan b. Ahmed, İbrahim b. Mustafa, Hasan b. Hasan, Muhzır Fettah Çelebi, Mustafa b. Mustafa, Muhzır Emin Çelebi, Memiş Beşe b. Abdullah