Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 80 Hüküm no: 32 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marpuçcu esnafından Mehmed b. Mehmed Emin’in, Kürkçü Hanı civarındaki Marpuçcu dükkânı içindeki âletlerin kendisine ait olduğu İhbâr. Mahmiye-i İstanbul’da Mahmud Paşa-yı Velî mahallesinde sâkin işbu bâ‘isü’l-vesîka Marpuçcu esnâfından Mehmed b. Mehmed Emin nâm kimesneden ber-vech-i âtî istihbâr-ı şer‘î sudûrundan sonra esnâf-ı merkūmdan Mehmed b. Hasan ve İbrahim b. Mehmed Sadık nâm kimesneler li-ecli’l-istihbâr meclis-i şer‘a hâzırân olup isre’l-istihbâr fi’l-hakīka zikr olunan Mahmud Paşa-yı Velî Çarşısı’nda Kürkçü Hanı civârında tenekeci dükkânları beynlerinde kâin bir bâb Marpuçcu dükkânı derûnunda mevcûde bâ-defter-i müfredât âlât-ı lâzıme-i ma‘lûme işbu müstahbir-i merkūm Mehmed’in bin iki yüz senesinden beri Hafize bt. İsmail ve Mehmed Tâhir b. İbrahim’den şirâen yedinde müstakıllen malı olduğu bizim yakīnen ma‘lûmumuzdur biz bu husûsa bu vech üzere şâhidleriz, lede’l-iktizâ şehâdet dahi ederiz deyü her biri alâ-tarîki’ş-şehâde haber vermeleriyle vâki‘ hâl hıfzen li’l-makāl bi’t-taleb ketb olundu. Fî 28 Rebî‘ülevvel sene 1241 Şühûdü’l-hâl: Muhzır Emin Çelebi, Muhzır Ali Çelebi, Muhzır Mehmed Çelebi