Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 81 Hüküm no: 34 Orijinal metin no: [4a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Paşa’nın menzil ve müştemilatını kardeşi Kasabbaşı Seyyid Ali Efendi’ye satması Menzil Mübâya‘ası ve ferâğ, 1500 guruş Sâbıkā Narda vâlisi olup el-hâletü hâzihî merfû‘u’l-vüzerâ mahrûse-i Edirne’de misâfiren sâkin devletlü Hasan Paşa b. Ahmed hazretleri tarafından husûs-ı âti’l-beyânda vekîl olduğu es-Seyyid Mehmed Said Ağa b. Halil ve es-Seyyid Mehmed Salih Ağa b. Mehmed Ârif şehâdetleriyle sâbit olan es-Seyyid Mehmed İzzet Ağa b. Ahmed meclis-i şer‘-i şerîf-i enverde müvekkil-i müşârün-ileyhin karındaşı işbu bâ‘isü’l-kitâb sâbıkā Kasabbaşı es-Seyyid Ali Efendi b. el-mezbûr es-Seyyid Ahmed tarafından kezâlik husûs-ı âtîde tasdîka vekîl-i şer‘îsi Süleyman Efendi b. Süleyman mahzarında bi’l-vekâle ikrâr-ı tam ve takrîr-i kelâm edip mahmiye-i İstanbul’da Süleymaniye Câmi‘-i şerîfi kurbünde Mollagürânî mahallesinde vâki‘ bir tarafdan Hafız Hüseyin Efendi menzili ve bir tarafdan Ahmed Paşa bahçesi ve bir tarafdan Mehmed Kethudâ makābiri ve bir tarafdan tarîk-i âm ile mahdûd bin üç yüz seksen altı zirâ‘ ve ittisâlinde kâin bir tarafdan Ahmed Bey ve Ömer Bey arsaları ve bir tarafdan Hüseyin Efendi menzili ve iki tarafdan bâlâda mezkûr mahal ile mahdûd beş yüz zirâ‘ ki cem‘an bin sekiz yüz seksen altı zirâ‘ arsa üzerine mebnî fevkānî ve tahtânî büyût-ı adîde ve müştemilât-ı sâire-i ma‘lûme ve kanavât-ı müsennâtına teba‘iyetle mülk olan bir masura üç çuvaldız mâ-i lezîz-i cârîyi müştemil bir bâb mülk menzil bâ-hüccet-i şer‘iye müvekkilim müşârün-ileyhin mülkü ve ittisâlinde kâin vakıf mahalleri dahi bâ-temessük-i mütevellî taht-ı tasarrufunda olmağla ben vakıf olan mahallerini ferâğ-ı kasr-ı kat‘î ile bedel-i ma‘lûm ve makbûz mukābelesinde mütevellîleri ma‘rifetleriyle mûmâ-ileyh es-Seyyid Ali Efendi’ye bi’l-vekâle ferâğ ve tefvîz, ol dahi ber-vechi muharrer tefevvüz ve kabûl etmekle sâlifü’z-zikr mülk olan menzili dahi bi’l-cümleti mâ-yeştemiluhû ve yahviyehû tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müvekkil-i mûmâ-ileyhe on beş bin guruşa bi’l-vekâle bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr on beş bin guruşu müşteri-yi müvekkil-i merkūm bana def‘ ü teslîm ben dahi yedinden bi’l-vekâle tamamen ahz ü kabz eyledim fîmâ-ba‘d sâlifü’l-beyân mülk olan menzil-i mahdûd-ı mezkûr dahi müvekkil-i merkūm es-Seyyid Ali Efendi’nin mülk-i müşterâsı ve hakk-ı sırfı olup müvekkilim paşa-yı müşârün-ileyhin kat‘a alâka ve medhali kalmamağla mebî‘î mezkûrun tağrîr ve gabnine müte‘allika da‘vâdan müvekkil-i mûmâ-ileyh es-Seyyid ali Efendi’nin zimmetini bi’l-vekâle ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 3 Ramazan 1241 Şühûdü’l-hâl: Muhzır Hüseyin Çelebi, Muhzır Genç Mehmed Çelebi, Muhzır Emin Çelebi