Bab Mahkemesi 54 Numaralı Sicil (H. 1102 / M. 1691) cilt: 20, sayfa: 119 Hüküm no: 101 Orijinal metin no: [16a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Ağa b. Hüseyin’in borcunu kefillerinin ödemesi Dergâh-ı âlî yeniçerilerinin dördüncü ağa bölüğüne mahsûs oda ahâlîsine mevkūfe nukūda bi’l-fi‘il mütevellî olan işbu râfi‘ü’l-vesîka Bayrakdar Arslan Beşe b. Abdullah meclis-i şer‘-i şerîf-i enverde, yine Dergâh-ı âlî yeniçerilerinin otuzuncu ağa bölüğüne mahsûs oda ahâlîsinden Ali Beşe b. Mustafa ve seksen yedinci cemâ‘atine mahsûs oda neferâtından Derviş Beşe b. Hasan mahzarlarında bi’t-tevliye üzerlerine da‘vâ ve takrîr-i kelâm edip, yine Dergâh-ı [âlî] yeniçerilerinin yedinci bölüğüne mahsûs oda ahâlîsinden gāib ani’l-meclis Serdengeçdi Ağası İbrahim Ağa b. Hüseyin b. Abdullah bundan akdem nukūd-ı mevkūfe-i mezbûreden kırk dokuz bin akçe idâne ve teslîm, ol dahi istidâne ve kabz eyledikde meblağ-ı mezbûr kırk dokuz bin akçeye gāibûn ani’l-meclis kırk dördüncü bölükden Hasan Beşe ve otuzuncu bölükden Hüseyin Beşe ve Süleyman Beşe ve otuz üçüncü bölükden Çorlulu Hüseyin Beşe ve Çorlulu Şaban Beşe ve Maraşlı Zaîm İbrahim Bey ve Zaîm Mehmed Bey ile işbu mezbûrân Ali Beşe ve Derviş Beşe’den her biri emr ve kabûlü hâviye kefâlet-i sahîha-i şer‘iyye ile alâ haddihî kefîl olmuşlar idi. Hâlâ suâl olunup meblağ-ı mezbûrun kefâletlerine binâ’en mezbûrândan alıverilmesi matlûbumdur dedikde, gıbbe’s-suâl mezbûrân Ali Beşe ve Derviş Beşe cevâblarında, fi’l-hakīka kaziyye bâlâda tafsîl olunan vech üzre olup, müdde‘î-i mezbûr Arslan Beşe nukūd-ı mevkūfe-i mezbûreden gāib-i mezbûr Serdengeçdi Ağası İbrahim Ağa b. Hüseyin b. Abdullah’a kırk dokuz bin akçe idâne ve teslîm eyledikde, gāibûn-ı mezbûrûn ile biz emr ve kabûlü hâviye kefâlet-i sahîha-i şer‘iyye ile alâ haddihî kefîl olup, meblağ-ı merkūm bi hükmi’l-kefâle zimmetimizde lâzımü’l-edâ deynimizdir deyu her biri tav‘an ikrâr ve i‘tirâf etmeğin, mûcebince meblağ-ı mezbûru müdde‘î-i mezbûra edâ ve teslîme mezbûrân Ali Beşe ve Derviş Beşe’ye ba‘de’t-tenbîh, mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Seroda Mehmed Beşe b. Mustafa, Hasan Beşe b. Abdullah, Ahmed Beşe b. Hüseyin, Mustafa b. Halil, Halil b. Mehmed ve gayruhüm.