Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 88 Hüküm no: 45 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçador ve kardeşi Mardıros’un yeniden inşa edecekleri dükkânın bir duvarını sınır komşuları Seyyid Eyüb’e ücretsiz kullandıracakları Ta‘ahhüd hücceti Mahmiye-i İstanbul’da Musalla kurbünde Nişâncı İbrahim Paşa mahallesinde mütemekkinler Haçador ve karındaşı Mardıros veledey Kirkor zimmîler meclis-i şer‘-i hatîr-i lâzımü’t-tevkīrde işbu bâ‘isü’l-vesîka es-Seyyid Eyüb b. Mustafa mahzarında ikrâr-ı tam ve takrîr-i kelâm edip mahmiye-i mezbûrede Dikilitaş ittisâlinde vâki‘ yedimizde mülk ve hakkımız olan bir bâb muhterik aşçı dükkânı arsası ittisâlinde merkūm es-Seyyid Eyüb’ün müstakıllen mülk ve hakkı olan kezâlik muhterik dükkân arsası olup biz dükkân-ı mezkûru binâya şürû‘ etmemizle zikri âtî dikeceğim direk ve müceddeden binâ edeceğim duvarın nısfı bizim ve nısf-ı âharı mezbûr Eyüb’ün olmak üzere teberru‘an kendi malımızla zikr olunan dükkânlar beynine bir direk dikip ve bir duvar ve zikr olunan dükkânı da müceddeden binâ edip mezbûr Eyüb dahi herne zaman dükkânının binâya şürû‘ eder ise bizim dikdiğimiz direğin nısf üzerine binâ edeceğimiz duvarı dahi ale’l-iştirâki’s-seviyy isti‘mâle her birimiz ta‘ahhüd-i tam ve ahd-i mîsâk eyledik dediklerinde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 15 S sene [1]242 Şühûdü’l-hâl: Hancı Ahmed, Muhzır Ali, Hancı Abdullah, Bıçak Mustafa, Muhzır Abdulfettah Çelebi, Leblebici Hüseyin, Leblebici Mehmed, Muhzır Mehmed Emin Çelebi