Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 89 Hüküm no: 47 Orijinal metin no: [22a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manil v. Abraham’ın kalpakçı dükkânı ve gediğini Katerina bt. Luka’ya satması 2000 guruş kalpakçı gediği Mahmiye-i İstanbul’da Yeni mahallede mütemekkin Manil v. Abraham zimmî meclis-i şer‘-i şerîf-i enverde işbu hâmilü’r-rakīm Katerina bt. Luka Nasrâniye tarafından husûs-ı âtîde tasdîka vekîl-i şer‘îsi Kosti v. Harito zimmî muvâcehesinde ikrâr-ı tam ve takrîr-i kelâm edip mahmiye-i mezbûrede Kocacılar Hanı karşısında vâki‘ bir bâb Kalpakçı dükkânı bâ-temessük-i mütevellî taht-ı tasarrufumda ve derûnunda mevcûde beyne’l-esnâf gedik ta‘bîr olunur bâ-defter-i müfredât Kalpakçı âlât-ı lâzıme-i ma‘lûmesi müstakıllen yedimde emvâlim olmağla ben dükkân-ı mezkûrun bundan akdem bâ-ma‘rifet-i mütevellî mersûm Katerina Nasrâniyeye bin guruş bedel mukābelesinde ferâğ ve tefvîz ve âlât-ı lâzıme-i ma‘lûmeyi dahi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mersûm Katerina Nasrâniyeye bin guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve tefevvüz ve kabz ü kabûl eyledikden sonra semen ve bedel cem‘an iki bin guruş müşteriye-i mezbûre Katerina Nasrâniye bana def‘ ü teslîm ben dahi yedinden tamamen ahz ü kabz eyledim fîmâ-ba‘d âlât-ı muharrere-i mezkûre mersûme Katerina Nasrâniyenin emvâl-i müşterâsı ve hakk-ı sırfı ve dükkân-ı mezkûr dahi dâhil-i havza-i tasarrufu olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i da‘vâdan mersûme Katerina Nasrâniyenin zimmetini kabûlü hâvî ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 12 S sene [1]242 Şühûdü’l-hâl: Ali Çelebi el-muhzır, Emin Çelebi el-muhzır.