Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 90 Hüküm no: 48 Orijinal metin no: [22a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Necmeddin Efendi’nin bazı eşyalarını Necibe bt. Abdullah’a satması Eşyâ mübâya‘ası 400 guruş Husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan mevlana Mehmed Necmeddin Efendi mahmiye-i İstanbul’da Aksaray kurbünde Alembey mahallesinde vâki‘ Necibe bt. Abdullah nâm hatunun menziline varıp zeyl-i vesîkada muharrerü’l-esâmî Müslimûn <> huzûrlarında akd-i meclis-i şer‘-i âlî ettikde menzil-i mezkûrda müsâfereten sâkine ve zâtı Müslimûn-ı merkūmûn ta‘rîfleriyle mu‘arrefe olan Hoşkadem bt. Abdullah nâm mu‘taka meclis-i ma‘kūd-ı mezkûrda kezâlik zâtı mu‘arrefe işbu bâ‘isetü’l-vesîka mezbûre Necibe Hatun mahzarında ikrâr-ı tam ve takrîr-i kelâm edip eşyâ-yı memlûkemden beş minder ve üç köhne çuka mak‘ad ve on iki çatma yasdık ve iki şilte ve altı çit yorgan ve bir Kıbrıs-kârî yorgan ma‘a çârşeb ve bir döşek ma‘a çârşeb ve bir döşek şiltesi ve on iki çatma yasdık ve iki şilte ve altı çit yorgan ve bir Kıbrıs-kârî yorgan ma‘a çârşeb ve bir döşek ma‘a çârşeb ve bir döşek şiltesi ve bir baş yasdığı ve üç şalî entari ve bir gezi boy hırkası ve bir nîmten gezi hırka ve bir nîmten Anadolu nâfesi kürk ve bir müsta‘mel sarı çubuklu Lahûrî şal ve bir beyazlı parça şal ve def‘a beyazlı şalî entari ve bir işleme entari ve bir basma entari ve bir kat câmeşûr ve bir çuka ferâce ve iki yemeni ve üç çevre ve bir İngiliz-kârî şal bezi şalî ve biri gezi ve biri işleme üç şalvar ve iki güğüm ve altı sahan ma‘a kapak ve bir süzgü ve bir hâmmâm tası ve bir maşraba ve dört tencere ma‘a kapak ve bir leğen ibrik ve bir sini ve bir kadayıf tepsisi ve bir nühâs mangal ve beş sagīr lenger ve iki hoş âb tası ve bir süzgü ve bir bardak ve beş tabak ve bir büberlik ve bir anbar ve bir sepet sandığım tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide mezbûre Necibe Hatun’a dört yüz guruşa bey‘ ü temlik ve yine malımdan yüz elli guruş kıymetli bir çift zümrüd küpemi mezbûre Necibe Hatun’a hibe-i sahîha-i şer‘iye ile hibe ve temlik ve teslîm eylediğimde ol dahi ber-vech-i muharrer iştirâ ve meclis-i hibede ittihâb ve temellük ve tesellüm ve kabz ü kabûl eyledikden sonra semeni olan meblağ-ı mezbûr dört yüz guruşu müşteriye-i mezbûre Necibe Hatun bana def‘ ve teslîm, ben dahi yedinden ahz ü kabz ve umûruma sarfla istihlâk eyledim, fîmâ-ba‘d eşyâ-yı muharrere-i mezkûre mezbûre Necibe Hatun’un emvâl-i müşterâsı ve zikr olunan zümrüd küpe dahi mâl-ı mevhûbu ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan tarafeynden herbirimiz âharın zimmetini ibrâ ve iskāt ve tarafeynden her birimiz ber-vech-i muharrer âharın ibrâsını kabûl eyledik dedikde gıbbe’t-tasdîki’ş-şer‘î vâki‘ hâli mevlana-yı merkūm mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘i-î inhâ ve takrîr etmeğin mâ-vaka‘a [bi’t-taleb ketb olundu.] Fî 16 S sene [1]242. Şühûdü’l-hâl: Müezzin Mahmud Efendi b. Ali, Sabuncu İsmail b. İbrahim, Ahmed Ağa b. Mustafa, Mustafa Ağa b. İbrahim, es-Seyyid Cafer Ağa b. es-Seyyid Süleyman, Ahmed Ağa b. Sadullah, Muhzır Emin Çelebi