Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 96 Hüküm no: 56 Orijinal metin no: [22b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eşinden boşanmış olan Fatıma’ya başka biriyle evlenmek için izin verilmesi Tahlîf, izin hücceti Mahmiye-i İstanbul’da Cerrâhpaşa kurbünde Kürkçübaşı mahallesinde sâkine bâ‘isetü’l-vesîka zâtı mu‘arrefe Fatıma bt. Veliyüddin nâm hatun meclis-i şer‘-i şerîf-i enverde ikrâr-ı tam ve takrîr-i kelâm edip zevc-i dâhilim olan gāib ani’l-meclis Beşiktaşlı İbrahim nâm kimesne zevc-i dâhilim olup târih-i kitâbdan yetmiş gün mukaddem beni tatlîk edip yevm-i talâkdan iş bu târih-i vesîkaya gelince yetmiş gün zarfında beyne’l-hayzeyn tuhr-ı kâmil tahallülü vechi üzere hâlâ üç hayz ile iddetim münkaziye olmuşdur deyü haber verip ve mezbûre Fatıma Hatun gāib-i mezbûr İbrahim’in zevce-i medhûlün-bihâsı olup zevci gāib-i merkūm târih-i mezbûrda tatlîk edip ve yevm-i talâkdan târih-i vesîkaya gelince yetmiş gün mürûr eylediği mahalle-i mezbûre ahâlisinden ve zâtı mezbûreyi ârifân es-Seyyid Mehmed Emin b. el-Hâc İsmail ve el-Hâc Mustafa b. Ali nâm kimesneler ihbârlarıyla mütehakkık olmağın mezbûre Fatıma Hatun gıbbe’t-tahlîfi’ş-şer‘î kavl-i muhtâr üzere mezbûre Fatıma Hatun müddet-i mezkûrede inkızâ-i iddeti hakkında yemîniyle şer‘an tasdîk olunmağla nefsini zevc-i âhara tezvîc ve inkâha izin birle mâ-vaka‘a [bi’t-taleb ketb olundu.] Fî 26 S sene [1]242 Şühûdü’l-hâl: Muhzır İsmail Çelebi, Muhzır Salih Çelebi, Muhzır Emin Çelebi, Muhzır Ali Çelebi