Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 96 Hüküm no: 57 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eşinden boşanan Aliye’ye başka biri ile evlenmesine izin verilmesi Tahlîf, izin hücceti Medîne-i Üsküdar’a muzâfe Kādı karyesinde sâkine bâ‘isetü’l-vesîka Aliye bt. Hasan nâm hatun meclis-i şer‘-i şerîf-i enverde ikrâr-ı tam ve takrîr-i kelâm edip zevc-i dâhilim olan gāib ani’l-meclis İsmail b. Hasan nâm kimesne zevc-i dâhilim olup târih-i kitâbdan yetmiş sekiz gün mukaddem beni tatlîk edip yevm-i talâkdan târih-i vesîkaya gelince müddet-i mezkûre zarfında beyne’l-hayzeyn tuhr-ı kâmil tahallülü vechi üzere hâlâ üç hayız ile iddetim münkaziye olmuşdur deyü haber verip ve mezbûre Aliye Hatun gāib-i mezbûr İsmail’in zevc-i medhûlün-bihâsı olup zevc-i gāib-i merkūm târih-i mezbûrda tatlîk edip yevm-i talâkdan târih-i kitâba gelince yetmiş sekiz gün mürûr eylediği Pastırmacı Hanı’nda sâkinler ve zâtı mezbûreyi ârifân es-Seyyid Ali b. Osman ve es-Seyyid Hüseyin b. Ali nâm kimesneler ihbârlarıyla mütehakkık olmağın mezbûre Aliye Hatun gıbbe’t-tahlîfi’ş-şer‘î kavl-i muhtâr üzere mezbûre Aliye Hatun müddet-i mezkûrede inkızâ-yı iddeti hakkında yemîniyle şer‘an tasdîk olunmağla nefsini zevc-i âhara tezvîc ve inkâha izin birle mâ-vaka‘a [bi’t-taleb ketb olundu.] Fî 26 S sene [1]242 Şühûdü’l-hâl: Muhzır Emin Çelebi, Muhzır Mehmed Çelebi, Muhzır Ali Çelebi