Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 97 Hüküm no: 59 Orijinal metin no: [23a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Muhtar Efendi’nin menzil hissesini kardeşi Mehmed Nuri’ye satması Menzil mübâya‘ası, 2500 guruş Mahmiye-i İstanbul’da Kumkapı kurbünde Süleymanağa mahallesinde sâkin iken bundan akdem fevt olan İsmail Ağa b. Ali’nin verâseti zevcesi Emine bt. Abdullah ile sulbiye kebîre kızı Şerife Fatıma Hatun ve sulbî kebîr oğulları es-Seyyid Ali Muhtâr Efendi ve es-Seyyid el-Hâc Mehmed Nuri Efendi ve es-Seyyid Mustafa Şakir Efendi’ye münhasıra ve mesele-i mîrâsları sekiz sehmden olup sihâm-ı mezbûreden bir sehmi zevcesi mezbûreye ve bir sehmi kızı mezbûreye ve ikişer sehmden altı sehmi oğulları mezbûrûna isâbeti tahakkukundan sonra mezbûr es-Seyyid Ali Muhtâr Efendi meclis-i şer‘-i şerîf-i enverde karındaşı işbu bâ‘isü’l-vesîka es-Seyyid Mehmed Nuri Efendi mahzarında bi’l-verâse ikrâr-ı tam ve takrîr-i kelâm edip mahalle-i mezbûrede vâki‘ bir tarafdan Kömürcüler Kethudâsı İsmail Ağa mülkü ve bir tarafdan Kahveci Mustafa Ağa mülkü ve bir tarafdan Arabacılar arsası ve bir tarafdan tarîk-i âm ile mahdûd ulyâda harem ta‘bîr olunur dört bab oda ve iki sagīr oda ve kenîf ve âbdesthâne ve vüstâda selamlık ta‘bîr olunur iki bâb oda ve bir mâ-beyn odası ve harem ta‘bîr olunur iki bâb oda ve bir kîlar ve bir kenîf ve bir âbdesthâne ve süflâda bir selamlık odası ve ahır ve bir kârgîr mahzen ve harem tarafında bir matbah ve bir kârgîr hamam ve bir orta kapı ve bir sokak kapısının arsa ve ebniyesinin ma‘lûmü’l-mikdârını karındaşım müşteri-yi merkūm es-Seyyid Mehmed Nuri Efendi’nin vâlidesinden müntakil bâ-hüccet-i şer‘iye mülkü ve mâ‘adâ ma‘lûmü’l-mikdârı mûrisimiz babam müteveffâ-yı mezbûrun hayatında mülkü ve eşcâr-ı müsmireli bahçe bâ-temessük-i mütevellî mûrisimiz babamız mezbûrun hayatında taht-ı tasarrufunda olup ba‘de vefâtihî bi’l-cümle mülk olan ebniye ve arsada olan ma‘lûmü’l-mikdâr hissesini ber-tashîh-i mezbûr benimle karındaşlarım ve vâlidemiz mezbûrûna mevrûs ve vakıf olan bahçe ancak benimle karındaşlarım mezbûrûna âdiyen intikāl etmekle ben menzil-i mezkûrun mülk olan arsa ve ebniyesinde ber-tashîh-i mezkûr mâlik olduğum iki sehm hissemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müşterekim merkūm es-Seyyid Mehmed Nuri Efendi’ye iki bin beş yüz guruşa bey‘ ü temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr iki bin beş yüz guruşu karındaşım müşteri-yi mezbûr bana def‘ ü teslîm ben dahi yedinden tamamen ahz ü kabz edip fîmâ-ba‘d menzil-i mahdûd-ı mezkûrun mülk olan mahâllinin ber-i‘tibâr-ı mezkûr dört sehmi irsen ve şirâen ve ma‘lûmü’l-mikdârı ancak irsen bâ-hüccet karındaşım mezbûr es-Seyyid Mehmed Nuri Efendi’nin mülk-i mahzı ve hakk-ı sırfı olup benim mülk olan mahâllinde kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 19 S sene [1]242 Şühûdü’l-hâl: Berber İsmail Ağa b. Salih, Muhzır Ali Çelebi, Mustafa b. Mehmed, Mehmed Ağa b. Abdullah, el-Hâc Abdullah Ağa, Muhzır Ebûbekir Çelebi, Mahmud Ağa, Şeyh Mehmed Efendi, Kethudâ İsmail Ağa, Muhzır Mehmed Çelebi