Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 98 Hüküm no: 60 Orijinal metin no: [23a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa’nın menzil arsasını Hacı Hasan Ağa’ya satması Müfrez arsa mübâya‘ası, 534 guruş. Mahmiye-i İstanbul’da Kumkapı kurbünde Muhsine Hatun mahallesinde sâkin İsmail Ağa b. Mehmed meclis-i şer‘-i şerîf-i enverde işbu bâ‘isü’l-vesîka el-Hâc Hasan Ağa b. Mehmed mahzarında ikrâr-ı tam ve takrîr-i kelâm edip mahalle-i mezbûrede vâki‘ bir tarafdan İmâm es-Seyyid Mehmed Ârif Efendi menzili ve arsası ve bir tarafdan tarîk-i hâs ve iki tarafdan tarîk-i âm ile mahdûd etrâf-ı erba‘ası taş duvar ile muhât derûnunda kârgîr mahzeni müştemil ma‘lûmü’z-zirâ‘ bir kıt‘a muhterik mülk menzil arsasının sâlifü’z-zikr İmâm es-Seyyid Mehmed Ârif Efendi menzili ve arsası tarafından tûlen ve arzan ma‘a müşterek mahzeni müştemil terbî‘an yüz doksan dört buçuk zirâ‘ mikdârı müfrez mahâlli bâ-hüccet-i şer‘iye yedimde mülk ve hakkım olmağla ben arsa-i müfreze-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûr el-Hâc Hasan Ağa’ya beş yüz otuz dört guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr beş yüz otuz dört guruşu müşteri-yi merkūm bana def‘ ü teslîm ben dahi yedinden tamamen ahz ü kabz eyledim, fîmâ-ba‘d arsa-i müfreze-i mezkûre mezbûr el-Hâc Hasan Ağa’nın mülk-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini ibrâ ve ıskāt ve her birimiz ber-vech-i muharrer âharın ibrâsını kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 24 S sene [1]242 Şühûdü’l-hâl: el-Hâc İbrahim Efendi, Mehmed Çelebi el-muhzır, Kaşıkçı Halil Ağa, es-Seyyid el-Hâc Mustafa Efendi b. Halil, Ali Çelebi el-muhzır.