Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 99 Hüküm no: 61 Orijinal metin no: [23a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha bt. Osman’ın bazı eşyalarını annesi Fatıma bt. Seyyid Ali’ye satması 300 guruş eşyâ mübâya‘ası Mahmiye-i İstanbul’da Laleli kurbünde Kuyumcu Bahşâyiş mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Şerife Zeliha bt. Osman nâm hatun meclis-i şer‘-i şerîf-i enverde vâlidesi kezâlik zâtı mu‘arrefe işbu bâ‘isetü’l-vesîka Şerife Fatıma bt. es-Seyyid Ali nâm hatun mahzarında ikrâr ve takrîr-i kelâm edip eşyâ-yı memlûkemden on iki çatma yasdık ve beş minder ve üç çuka mak‘ad ve bir orta keçesi ve iki köşe yasdığı ve iki köşe yüz yasdığı ve bir döşek ve bir şilte ve bir baş yasdığı ve bir yüz yasdığı ve iki yorgan ma‘a çârşeb ve iki tencere ma‘a kapak ve üç sahan ma‘a kapak ve bir leğen ma‘a ibrik ve bir ta‘âm tepsisi ve bir kadayıf tepsisi ve bir güğüm ve bir mangalımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile vâlidem mezbûre Şerife Fatıma Hatun’a üç yüz guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve kabz ü kabûl eyledikden sonra semeni olan meblağ-ı mezbûr üç yüz guruşu vâlidem mezbûre bana def‘ ü teslîm ben dahi yedinden tamamen ahz ü kabz ve umûruma sarfla istihlâk eyledim. Fîmâ ba‘d eşyâ-yı muharrere-i mezkûre vâlidem mezbûrenin emvâl-i müşterâsı ve hakk-ı sırfı olup benim kat‘a alâka ve medhalim kalmamışdır dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 22 S sene [1]242 Şühûdü’l-hâl: Es-Seyyid Kemaleddin b. es-Seyyid Osman, Muhzır Feyzullah Çelebi, Muhzır Ali Çelebi, Es-Seyyid İbrahim b. Mustafa