Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 100 Hüküm no: 62 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bogasıcı Yuvan’ın kiracısı olduğu yangın geçirmiş dükkânı kendi oturmak şartıyla tamir etme talebi Ta‘ahhüd hücceti Vilâyet-i Anadolu’da Niğde re‘âyasından olup Kebeciler Hanı’nda mütemekkin Bogasıcı Yuvan v. Sefer zimmî bogasici esnâfı kethudâsı Hafız Mehmed Ağa b. Hafız Ahmed ve Mehmed Usta b. el-Hâc Ahmed hâzır olduğu hâlde meclis-i şer‘-i şerîf-i enverde takrîr-i kelâm ve ta‘bîr ani’l-merâm edip Çarşı-yı kebîrde haffâflar çarşısında vâki‘ ma‘lûmü’l-hudûd bir bâb vakıf dükkân bundan akdem hâlik olan Sarrâf Agob zimmînin taht-ı tasarrufunda olup ve derûnunda mevcûde âlât-ı lâzıme-i ma‘lûme yedinde malı olup ba‘de helâkihî dükkân-ı mezkûr oğlu Bogos nâm sagīre âdiyen intikāl ve âlât-ı lâzıme dahi sagīr-i mersûma mevrûs olup ve ben dükkân-ı mezkûrda müddet-i vâfireden beri müsteciren mütemekkin olup lâkin zikr olunan dükkân bu esnâda muhterik olmağla ben zikr olunan dükkânda yine mütemekkin olmak üzere dükkân-ı mezkûru kendi malımla teberru‘an li’l-vakıf müceddeden binâ ihdâs etmek üzere ta‘ahhüd eyledim dedikde mâ-vaka‘a [bi’t-taleb ketb olundu.] Fî 10 S sene [1]242 Şühûdü’l-hâl: Muhzır Ali Çelebi, Muhzır Ebu Bekir Çelebi, Muhzır Genç Mehmed Çelebi.