Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 100 Hüküm no: 63 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gaspar ve kardeşi Artin’in verâset hususunda Kirkor’u vekil tayin etmeleri Vekâlet hücceti Vilâyet-i Anadolu’da Eğin kasabası ahâlisinden iken bundan akdem birbirini müte‘âkibeten hâlike olan Zümrüd ve kız karındaşı Yakut bintey Gaspar v. Adam Nasrâniyelerin verâsetleri li-ebeveyn karındaşları oğulları Gaspar ve Artin veledey Ohan zimmîlere inhisârı tahakkukundan sonra mersûmân Gaspar ve Artin zimmîler meclis-i şer‘-i hatîr-i lâzımü’t-tevkīrde işbu hâmilü’r-rakīm Kirkor v. Babik zimmî muvâcehesinde her biri bi’l-verâse ikrâr-ı tam ve takrîr-i kelâm edip mûriselerimiz ammetelerimiz hâliketan-ı mersûmetânın hîn-i helâklerinde yanlarında mevcûde bi’l-cümle terekelerini mahâllinde vâzı‘ü’l-yed olanlardan taleb ve da‘vâ ve ahz ü kabza ve lede’l-iktizâ sulh ve ibrâya ve makbûzunu bizlere îsâl ve teslîme ve sâir cemî‘ umûrumuza tarafımızdan mersûm Kirkor zimmîyi vekîl nasb ü ta‘yîn eyledik dediklerinde ol dahi ber-vech-i muharrer vekâlet-i mezkûreyi kabûl ve merâsimini mahâllinde kemâ-yenbagī edâya ta‘ahhüd ve iltizâm etmeğin mâ-vaka‘a [bi’t-taleb ketb olundu.] Fî-gurre-i S sene [1]242 Şühûdü’l-hâl: Osman Ağa b. Hüseyin, Muhzır Ali Çelebi, Muhzır Ebûbekir Çelebi, Ahmed b. Mehmed, Manuk v. Bogos, Artin v. Abraham