Bab Mahkemesi 54 Numaralı Sicil (H. 1102 / M. 1691) cilt: 20, sayfa: 121 Hüküm no: 104 Orijinal metin no: [16b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Safiye Hatun bt. Kenan Ağa’nın menzilini Emine Hatun bt. Mahmud Ağa’ya satması Husûs-ı âti’z-zikrin mahallinde ketb ü tahrîri iltimâs olunmağın, savb-ı şer‘den irsâl olunan İbrahim Efendi b. Mehmed el-Hamîdî mahmiye-i İstanbul’da Sarrâc Doğan mahallesinde sâkine umdetü’l-mekânât Safiye Hâtun bt. el-merhûm Kenan Ağa’nın menzil[ine] varıp, zeyl-i kitâbda muharrerü’l-esâmi müslimîn huzûrunda akd-i meclis-i şer‘-i nebevî eyledikde, mezbûre Safiye Hâtun ba‘de’t-ta‘rîfi’ş-şer‘î meclis-i ma‘kūd-ı mezbûrda, umdetü’l-muhadderât Emine Hâtun bt. Mahmud Ağa tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ile ârifân Ahmed Çelebi b. Mehmed ve Ramazan Bey b. Osman nâm kimesneler şehâdetleriyle şer‘an sâbit olan umdetü’l-eşbâh el-Hâc Mehmed Ağa b. Abdullah mahzarında ikrâr-ı tâm ve takrîr-i kelâm edip, silk-i mülkümde münselik olup, mahmiye-i mezbûrede Molla Güranî mahallesinde vâki‘ bir tarafı benim âhar mülküm ve bir tarafı ba‘zan vakıf odalar ve ba‘zan Ahmed Çelebi mülkü ve iki tarafı tarîk-i âm ile mahdûd, dâhiliyesi dört bâb fevkānî oda ve iki sofa ve dehliz ve iki tahtânî oda ve bir kiler ve bir matbah ve bir mahtab ve iki halvetli bir hamam ve câmekân odası ve iki kenîf ve zât-ı eşcâr-ı müsmire ve gayri müsmire hadîka ve hâriciyesi üç bâb fevkānî oda ve iki sofa ve iki bâb tahtânî oda ve kameriyeli bir tahta-pûş ve iki kenîf ve iki ahır ve iki su kuyusu ve kezâlik zât-ı eşcâr-ı müsmire ve gayr-ı müsmire hadîkayı muhtevî menzilimi, bi cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûre Emine Hâtun’a iki yük seksen bin akçe[ye] bey‘ ve temlîk ve teslîm, ol dahi ber vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr iki yük seksen bin akçe[yi] mezbûre Emine Hâtun yedinden bi’t-tamâm ve’l-kemâl ahz u kabz eyledim. Ba‘de’l-yevm menzil-i mahdûd-ı mezbûr mezbûre Emine Hâtun’un mülk-i müşterâsı ve hakk-ı sırfı olup menzil-i mezbûrda benim kat‘â alâka ve medhalim ve hakk-ı müstahakkım kalmamışdır, mezbûre Emine Hâtun keyfe mâ teşâ mutasarrıfe olsun dedikde, gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb ü tahrîr edip, ba‘dehû ma‘an irsâl olunan İsmail b. Mustafa ve Hüseyin b. Halil nâm kimesneler ile meclis-i şer‘a gelip, alâ vukū‘ihî inhâ ve takrîr etmeğin, mâ hüve’l-vâki‘ bi’t-taleb ketb olundu. Fî gurreti [Cumâde]lâhire li sene isneteyn ve mi’e ve elf. Şuhûdü’l-hâl: Yazıcı İbrahim Çelebi b. Ahmed, der-mahalle Ahmed b. Mahmud, Hasan Çelebi b. Ramazan, der-mahalle Veli Çelebi b. Ali, der-mahalle Ahmed Çelebi b. Mehmed, Ramazan Çelebi b. Osman, Mehmed Efendi b. Halil.