Bab Mahkemesi 54 Numaralı Sicil (H. 1102 / M. 1691) cilt: 20, sayfa: 122 Hüküm no: 105 Orijinal metin no: [16b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mehmed’in menzilini Hatice bt. Hacı Ahmed’e satması Husûs-ı âti’z-zikrin mahallinde ketb ü tahrîri için savb-ı şer‘den mevlânâ Ali Efendi b. Mustafa irsâl olunup, ol dahi Mahmiye-i İstanbul’da Sultan Selim kurbunda Çukur Bostan mahallesi sâkinelerinden olup, zâtı ma‘rifet-i şer‘iyye ile ârifân Hasan Çelebi b. Ahmed [ve] Abdurrahman b. Hüseyin ta‘rîfleriyle mu‘arrefe olan Fâtıma bt. Mehmed nâm hâtunun menziline varıp, zeyl-i rakīmde muharrerü’l-esâmi müslimîn huzûrlarında akd-i meclis-i şer‘-i şerîf eyledikde, mezbûre Fâtıma Hâtun meclis-i ma‘kūd-ı merkūmda işbu râfi‘atü’l-kitâb Hatice bt. el-Hâc Ahmed mahzarında ikrâr ve takrîr-i kelâm edip, mahalle-i mezbûrede vâki‘ bir tarafdan Fâtıma bt. Halil mülkü ve bir tarafdan Fâtıma bt. Ahmed Bey mülkü ve bir tarafdan tarîk-i hâs ve bir tarafdan tarîk-i âm ile mahdûd eş-Şeyh Yavsî Vakfı’na senede otuz akçe mukāta‘a-i kadîmesi olup, iki bâb fevkānî oda ve bir bâb tahtânî oda ve bir sofa ve hâricen bir oda ve bir su kuyusu ve kenîfi müştemil menzilimi, bi cümleti’t-tevâbi‘ ve’l-levâhık mezbûre Hatice’ye yüz guruşa bey‘-i bâtt-ı sahîh-i şer‘iyye ile bey‘ ve teslîm, ol dahi minvâl-i muharrer üzre iştirâ ve kabûl ettikden sonra semeni olan meblağ-ı mezbûr yüz guruşu mezbûre Hatice’ye cihet-i karzdan olan yüz guruş deynime takās merkūme Hatice dahi mukāssa ve kabûl ettikden sonra menzil-i mahdûd-ı mezkûr merkūme Hatice’nin mülk-i müşterâsı ve hakk-ı sırfı olmuşdur. Keyfe mâ teşâ ve tahtâr mutasarrıfa olsun dedikde, gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb ü tahrîr, ba‘dehû ma‘an ba‘s olunan Yahya Çelebi b. Ahmed ve Mahmud Çelebi b. Hasan meclis-i şer‘a gelip alâ vukū‘ihî inhâ ve takrîr etmeğin, mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Ali Efendi b. Mehmed el-imâm, Abdullah b. Ali el-müezzin, el-Hâc Abdülaziz b. Bektaş, el-Hâc Hüseyin b. Receb, es-Seyyid Osman b. Hüseyin, Haydar Beşe b. Ali.