Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 105 Hüküm no: 70 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Bezircioğlu Ali’nin kahve ve bakkal dükkânlarını Humbaracı Hüseyin Ağa’ya satması Dükkân mübâya‘ası, 600 guruş Medîne-i Üsküdar’a muzâfe Şile kasabası ahâlisinden olup mahmiye-i İstanbul’da Fethiye kurbünde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Âişe bt. Bezircioğlu Ali nâm hatun meclis-i şer‘-i şerîf-i enverde zevci işbu bâ‘isü’l-vesîka Humbaracı Hüseyin Ağa b. Mehmed mahzarında ikrâr-ı tam ve takrîr-i kelâm edip akd-i âti’z-zikrin sudûruna değin müstakılleten yedimde mülküm olup kasaba-i mezbûrede deryâ kenârında vâki‘ ma‘lûmü’l-hudûd bir bâb kahve dükkânı ve tahtında bir bâb bakkāl dükkânım tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile zevcim mezbûr Hüseyin Ağa’ya altı yüz guruşa bey‘ ü temlik ve mahâllinde zabta tarafımdan merkūmu taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı [mezbûr] altı yüz guruşu zevcim mezbûr bana def‘ ü teslîm ben dahi yedinden tamamen ahz ü kabz eyledim. Fîmâ-ba‘d sâlifü’l-beyân iki bâb dükkân zevcim mezbûr Hüseyin Ağa’nın mülk-i müşterâsı ve hakk-ı sırfı olup benim kat‘a alâka ve medhalim kalmamışdır dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 5 Ra sene [1]242 Şühûdü’l-hâl: Muhzır Ali Çelebi, Ali Reis b. Hüseyin, Osman b. Abdullah, Muhzır Hüseyin Çelebi