Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 105 Hüküm no: 71 Orijinal metin no: [24a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Bezircioğlu Ali’nin eşi Humbaracı Hüseyin Ağa’yı vekil tayin etmesi Vekâlet Medîne-i Üsküdar’a muzâfe Şile kasabası ahâlisinden olup mahmiye-i İstanbul’da Fethiye kurbünde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Âişe bt. Bezircioğlu Ali nâm hatun meclis-i şer‘-i şerîf-i enverde zevci işbu bâ‘isü’l-vesîka Humbaracı Hüseyin Ağa b. Mehmed mahzarında ikrâr ve takrîr-i kelâm edip kasaba-i mezbûrede vâki‘ çiftlik ta‘bîr olunur Molla Hasan’dan tefevvüzen bâ-tapu taht-ı tasarrufumda olan tarlalarımı karındaşım oğlu olup kasaba-i mezbûrede sâkin Ahmed nâm kimesne iki sene zabt u zirâ‘at etmekle zikr olunan tarlaların noksân-ı? arzı ve sâir cemî‘ umûrumu rü’yete tarafımdan zevcim mezbûr Hüseyin Ağa’yı vekîl ve nâib-i menâb nasb ü ta‘yîn eyledim dedikde, ol dahi ber-vech-i muharrer vekâlet-i mezkûreyi kabûl ve merâsimini kemâ-yenbagī mahâllinde edâya ta‘ahhüd ve iltizâm etmeğin mâ-vaka‘a [bi’t-taleb ketb olundu.] Fî 5 Ra sene [1]242 Şühûdü’l-hâl: Muhzır Ali Çelebi, Ali Reis b. Hüseyin, Osman b. Abdullah, Muhzır Hüseyin Çelebi.