Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 106 Hüküm no: 73 Orijinal metin no: [24a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ebubekir’in bazı ev eşyalarını Ayşe bt. Ali’ye satması Eşyâ mübâya‘ası, hibe. 1500 guruş Mahmiye-i İstanbul’da Sultan Süleyman Han Câmi‘-i şerîfi kurbünde Akşemseddin mahallesinde sâkin el-Hâc Ebûbekir b. Ömer meclis-i şer‘-i şerîf-i enverde zevcesi zâtı mu‘arrefe işbu bâ‘isetü’l-vesîka Âişe bt. Ali nâm hatun tarafından husûs-ı âti’z-zikirde tasdîka vekîli Nühâsî Mehmed Ağa b. Ali mahzarında ikrâr-ı tam ve takrîr-i kelâm edip eşyâ-yı memlûkemden sekiz minder ve on beş Kıbrıs basması yasdık ve dokuz aded çatma yasdık ve üç çuka mak‘ad ve iki döşek ve iki şilte ve dört baş yasdığı ve dört yüz yasdığı ve altı yorgan ve sekiz pencere perdesi ve bir yün seccâde ve dokuz sahan ma‘a kapak ve beş tencere ve bir kebîr tepsi ve bir polad tepsi ve bir kadayıf tepsisi ve bir şamdan tepsisi ve bir kazgan ve bir leğen ibrik ve bir câmeşûy leğeni ve birmiskāl …? tahta ve bir kebîr tâbe ve bir kefkîr ve bir karavana ve bir su güğümü ve bir musluklu güğüm ve dört şamdan ve iki iskemle ve bir çalar sâ‘at ve bir endâm aynası ve beş tabak ve üç bardak ve bir orta keçesi tarafeynden îcâb ve kabûlü hâvî şurût-ı müfside ve muvâza‘adan ârî bey‘-ibâtt-ı sahîh-i şer‘î ve safka-i vâhide ile zevcem müvekkile-i mezbûre Âişe Hatun’a bin beş yüz guruşa bey‘ ü temlik ve yine yedimde malım olan bir sîm gülâbdân ile bir sîm buhurdânım zevcem mezbûreye hibe-i sahîha-i şer‘iye ile hibe ve temlik ve teslîm eylediğimde ol dahi ber-vech-i muharrer iştirâ ve meclis-i hibede ittihâb ve temellük ve tesellüm ve kabz ü kabûl eyledikden sonra semeni olan meblağ-ı mezbûr bin beş yüz guruşu zevce-i müvekkile-i mezbûre Âişe Hatun bana def‘ ü teslîm ben dahi yedinden tamamen ve kâmilen ahz ü kabz eyledim. Fîmâ-ba‘d eşyâ-yı muharrere-i mezkûre zevcem müvekkile-i mezbûrenin emvâl-i müşterâsı ve hakk-ı sırfı ve hüliyyât-ı mezkûre dahi dâhil-i havza-i tasarrufu olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan zevcem müvekkile-i mezbûre Âişe Hatun’un zimmetini kabûlü hâvî ibrâ-yı âmm-ı sahîh-i şer‘î ile ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 5 Ra sene [1]242 Şühûdü’l-hâl: Bostânî Şakir Efendi, Derviş Ahmed, Hacı Seyyid Ağa, Ali Ağa, el-Hâc Osman Ağa, İmâm Efendi, Bostânî el-Hâc İsmail, Muhzır Fettah Çelebi, Muhzır Mehmed Çelebi.