Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 107 Hüküm no: 74 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Yamakoğlu Mehmed’in menzilini satması 1200 guruş mübâya‘a Vilâyet-i Anadolu’da medîne-i Kastamonu mahallâtından Kaymak mahallesi ahâlisinden olup mahmiye-i İstanbul’da Küçük Zağferân Hanı’nda misâfiren sâkin Ali Yamakoğlu Mehmed b. Ahmed meclis-i şer‘-i şerîf-i enverde işbu bâ‘isü’l-vesîka Hudâîoğlu? Ahmed b. Hasan mahzarında ikrâr-ı tam ve takrîr-i kelâm edip akd-i âti’z-zikrin sudûruna değin müstakıllen yedimde mülk ve hakkım olup zikr olunan Kaymak mahallesinde vâki‘ bir tarafdan Kürsülüoğlu menzili ve bir tarafdan Debbâğ dâmâdı Mehmed menzili ve iki tarafdan mer‘a ile mahdûd altı oda ve iki sofa ve üç kenîf ve iki çatı ve bir ahırı müştemil bir bâb mülk menzilimi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile merkūm Ahmed’e bin iki yüz guruşa bey‘ ü temlik ve mahâllinde zabta tarafımdan merkūmu taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr bin iki yüz guruşu müşteri-yi merkūm bana def‘ ü teslîm ben dahi yedinden tamamen ahz ü kabz eyledim fîmâ-ba‘d menzil-i mahdûd-ı mezkûr merkūm Ahmed’in mülk-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 5 Ra sene [1]242 Şühûdü’l-hâl: Tanacıoğlu Abdullah, Mestanoğlu Hidayet, Bostanzâde Hüseyin Efendi, Akmehmedoğlu Ahmed, Müftüoğlu Hasan, Muhzır Ebûbekir Çelebi, Muhzır Ali Çelebi