Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 108 Hüküm no: 75 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kigork v. Manuk’un terzi dükkânı gediğini Ahmed Nazif Ağa’ya satması Derzi Dükkânı, 850 guruş. Mahmiye-i İstanbul’da Balat kapısı dâhilinde mütemekkin Kigork v. Manuk zimmî meclis-i şer‘-i <<şerîf-i enverde>> hatîr-i lâzımü’t-tevkīrde işbu bâ‘isü’l-vesîka Ahmed Nazif Ağa b. Halil mahzarında ikrâr-ı tam ve takrîr-i kelâm edip mahmiye-i mezbûrede Batpazarı civârında câmi‘-i şerîf sokağında kâin ma‘lûmü’l-hudûd bir bâb terzi dükkânı derûnunda mevzû‘ beyne’l-esnâf gedik ta‘bîr olunur müstakıllen yedimde emvâlim olan bâ-defter-i müfredât âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm Ahmed Nazif Ağa’ya sekiz yüz elli guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr sekiz yüz elli guruşu müşteri-yi merkūm bana def‘ ü teslîm ben dahi yedinden tamamen ahz ü kabz eyledim. Fîmâ ba‘d âlât-ı muharrere-i mezkûre merkūm Ahmed Nazif Ağa’nın emvâl-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan herbirimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 15 Ra sene [1]242 Şühûdü’l-hâl: Ali Çelebi el-muhzır, Hasan Ağa b. el-Hâc Mustafa, Mehmed Ârif Ağa, Hüseyin Çelebi el-muhzır, İsmail Ağa b. Abdullah.