Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 109 Hüküm no: 76 Orijinal metin no: [24b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Kasabbaşı Ahmed Ağa’nın Ali Paşa’dan olan alacağının vârisleri tarafından tahsili Ahz, kabz, ibrâ, 10681 guruş Vilâyet-i Rumeli’nde Koniça kazâsında sâkin iken bundan akdem fevt olan Hâssa Hasekilerinden sâbıkā Kasabbaşı Ahmed Ağa b. Hasan b. Murad’ın verâseti zevce-i menkûha-i metrûkesi Emine bt. Osman b. Abdullah ile li-ebeveyn er karındaşı Halil Ağa b. el-mezbûr Hasan b. el-mezbûr Murad’a inhisârı tahakkukundan sonra kendiden asıl ve zevce-i mezbûre Emine Hatun tarafından husûs-ı âti’l-beyânda vekîl olduğu zâtını ârifân İsmail Ağa b. Ahmed ve Mehmed Salih Ağa b. Ebâbekir şehâdetleriyle sâbit olmağla vekâleten meclis-i şer‘-i şerîf-i enverde işbu <> bâ‘isü’l-kitâb sadr-ı sâbık Ali Paşa hazretleri tarafından kezâlik husûs-ı âtîde tasdîka vekîli Ebûbekir Ağa b. Abdullah mahzarında bi’l-asâle ve bi’l-vekâle ikrâr-ı tam ve takrîr-i kelâm edip mûrisimiz karındaşım müteveffâ-yı mezbûrun hayatında paşa-yı müşârün-ileyh zimmetinde cihet-i deyn-i şer‘îden on bin altı yüz seksen bir guruş alacak hakkı olup paşa-yı müşârün-ileyh deyni olan meblağ-ı mezbûr on bin altı yüz seksen bir guruş mukābelesinde malından bir çift mücevherli piştovunu mûrisimiz müteveffâ-yı mezbûra rehin vaz‘ ü teslîm eylediğinde ol dahi irtihân ve kabz ü kabûl edip mûrisimiz müteveffâ-yı merkūm alacağı olan meblağ-ı mezbûru paşa-yı müşârün-ileyhden kabz birle rihân-ı mezkûreyi rehinden fekk ve paşa-yı müşârün-ileyhe teslîm etmeksizin fevt ve alacağı olan meblağ-ı mezbûr on bin altı yüz seksen bir guruş benimle zevcesi müvekkilem mezbûre Emine Hatun’a mevrûs olmağla ben bi’l-asâle ve bi’l-vekâle ve bi’l-verâse alacağım olan meblağ-ı mezbûr on bin altı yüz seksen bir guruşun beş bin altı yüz seksen bir guruşunu rızâmla hatt ü tebdîl etmemle bâkīsi olan meblağ-ı mezbûr beş bin guruşu paşa-yı müşârün-ileyh kapıkethudâsı Mehmed Bey yediyle bana def‘ ü teslîm ben dahi yedinden bi’l-asâle ve bi’l-vekâle ve bi’l-verâse ahz ü kabz ve rehn-i mezkûru kendüye teslîm eyledim. Fîmâ ba‘d meblağ-ı mecmû‘-ı mezbûr <> on bin altı yüz seksen bir guruşdan paşa-yı müşârün-ileyhin yed ve zimmetinde bir akçe ve bir habbe bâkī kalmamağla husûs-ı mezkûra müte‘allika da‘vâdan paşa-yı müşârün-ileyhin zimmetini bi’l-asâle ve bi’l-vekâle ve bi’l-verâse ibrâ ve iskāt eyledim dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 9 Ra sene [1]242 Şühûdü’l-hâl: Ali Çelebi el-muhzır, Emin Çelebi el-muhzır Mehmed Çelebi el-muhzır.