Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 110 Hüküm no: 77 Orijinal metin no: [24b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenci Ayşe’nin Ümmügülsüm bt. Mustafa’dan hizmet bedelini tahsil etmesi Ücretden ibrâ Mahmiye-i İstanbul’da Yahyagüzel mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Zenciye Âişe bt. Mustafa nâm hatun meclis-i şer‘-i şerîf-i enverde işbu bâ‘isetü’l-vesîka Ümmügülsüm bt. Mustafa’nın zevci ve tarafından husûs-ı âti’l-beyânda vekîl olduğu zâtını ârifân es-Seyyid Mehmed b. Ali ve Mustafa b. Ali şehâdetleriyle sâbit es-Seyyid Ömer b. Ahmed mahzarında ikrâr-ı tam ve takrîr-i kelâm edip ben ücret ile hizmet eder makūlesinden olup bundan akdem müvekkile-i mezbûrenin menzilinde ücret kavilsiz dört sene hizmet ve bu esnâda mufârakat etmemle müddet-i mezkûrede eylediğim hizmetim için müvekkile-i mezbûre bana malından üç yan minderi ve üç çit yasdık ve on çit yasdık ve bir döşek ve iki baş yasdığı ve iki çit yorgan ve üç çârşeb ve bir seccâde ve bir faraş ve bir süpürge ve bir iskemle ve iki şamdan ve bir mum mikrâs ve bir mangal ve bir leğen ma‘a ibrik ve üç tencere ma‘a kapak ve bir tâbe ve bir tepsi ve dört sahan ma‘a kapak ve bir şorba tası ma‘a kapak ve bir karavana ve bir kadayıf tepsisi ve bir hamam tası ve bir kepçe ve bir kefkîr ve bir sagīr sahan ve bir dökme tepsi ve bir deste kaşık ve iki ateş küreği ve üç boğça ve dokuz işleme uçkur ve iki işleme havlu ve dört işleme makreme ve beş ketan don ve dört ketan gömlek ve bir hamam takımı ve bir havlu ve bir boğça ve üç çârşeb ve bir Mısır çârşebi ve yedi hilâlî gömlek ve iki şalvar ve üç çit entari ve bir şalî entari ve bir şalî entari ve üç gezi hırka ve bir yazma hırka ve bir Mağrib şalı ve bir el havlusu ve iki Tunus fesi ve on yemeni ve bir zümrüd küpe ve iki Lehliyeli? şalvar ve bir çit entari ve bir canfes hırka ve bir çit içlik ve bir boyama gömlek ve bir Lahûrî şal ve bir çit sofra ve bir işleme peşkir ve iki âbdest havlusu ve diğer işleme peşkir ve bir penbe zâr gömlek ve iki işleme uçkur ve bir sûzenî uçkur ve bir merinos şal kîse ve bir işleme akçe kîsesi ve bir Diyarbekir Şalvarı ve <> ve bir köhne şalî şalvar ve bir köhne çit şalvar ve bir köhne Lahorî şal ve bir Acem şalı boğça ve bir hakīr entari ve bir yazma şalvar ve bir hilâlî gömlek ve diğer bir Lahorî şal ve bir penbe zâr don ve dört uçkur ve üç işleme sagīr yemeni ve iki yaşmak makreme ve bir boğça ve bir sepet sandık ve bir elmas traş bardağını def‘ ü teslîm ben dahi yedinden tamamen ahz ü kabz edip müddet-i mezkûrede eylediğim hizmetim için ziyâde ecr-i misl mutâlebesine ve hukūk-ı sâire-i şer‘iyeye müte‘allika âmme-i da‘vâdan mezbûre Ümmügülsüm Hatun’un zimmetini ibrâ-yı âmm-ı sahîh-i şer‘î ile ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî-gurrei Ra sene [1]242 Şühûdü’l-hâl: Muhzır Ali Çelebi, Muhzır Emin Çelebi, Muhzır Fettah Çelebi.