Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 111 Hüküm no: 78 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hacı Ömer Ağa’nın vârislerinin Bezzazistânî Ahmed Efendi’nin şirket ortaklığından zimmetini ibra etmeleri Şirketten her biri ibrâ Vilâyet-i Anadolu’da Burdur kasabasında sâkin iken bundan akdem fevt olan el-Hâc Ömer Ağa b. Mehmed’in verâseti zevce-i menkûha-i metrûkesi Emine bt. Hüseyin b. Abdullah ile sulbî kebîr oğulları Mehmed ve Mustafa’ya ve sulbiye kebîre kızı Zeliha’ya inhisârı tahakkukundan sonra mezbûrûn Emine ve Mahmud ve Mustafa ve Zeliha taraflarından husûs-ı âti’l-beyânda vekîl olduğu zâtlarını ârifân Ahmed Ağa b. el-Hâc Adem ve el-Hâc Halil Ağa b. Nasuh şehâdetleriyle sâbit olan el-Hâc Mehmed Ağa b. el-Hâc Ali meclis-i şer‘-i şerîf-i enverde işbu bâ‘isü’l-vesîka Bezzâzistânî Ahmed Efendi b. Süleyman b. Abdullah mahzarında bi’l-vekâle ikrâr-ı tam ve takrîr-i kelâm edip müvekkillerim mezbûrûnun mûrisleri müteveffâ-yı mezbûrun merkūm Ahmed Efendi ile hayatında beynlerinde bin iki yüz on bir senesinden kırk iki senesine gelince ahz ü i‘tâ cereyân edip kable’l-hesâb müvekkillerim mezbûrûnun mûrisleri fevt olmağla biz bi’l-cümle beynlerinde cereyân eden ahz ü i‘tânın hesâbını mezbûr Ahmed Efendi ile şühûd muvâcehelerinde yegân yegân rü’yet eylediğimizde müteveffâ-yı mezbûrun mezbûr Ahmed Efendi zimmetinde onun dahi müteveffâ-yı mezbûr zimmetinde bir akçe ve bir habbe hakları ve alacakları zuhûr etmemekle ben husûs-ı mezkûra ve sâir cemî‘ hukūk-ı şer‘iyeye müte‘allika da‘vâdan mezbûr Ahmed Efendi’nin zimmetini bi’l-vekâle, ol dahi kezâlik husûs-ı mezkûra ve vâlidesi Zeliha nâm müteveffiye ile câriyesi müteveffiye-i mezbûre Zeyneb’in terekelerine ve hukūk-ı sâire-i şer‘iyeye müte‘allika da‘vâdan müvekkillerim mezbûrûnun zimmetlerini bi’l-asâle ibrâ ve iskāt ve her birimiz ber-vech-i muharrer âharın ibrâsını bi’l-asâle ve bi’l-vekâle kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 5 Ra sene [1]242 Şühûdü’l-hâl: Muhzır Mehmed Çelebi, Muhzır Emin Çelebi