Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 111 Hüküm no: 79 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Emine’nin, Mustafa Vehbi’ye evlatlık verilmesi ve nafaka tahsisi Tebennî hücceti, îcâr Mahmiye-i İstanbul’da Ayasofya-i kebîr mahallesinde sâkin işbu bâ‘isü’l-vesîka Mustafa Vehbi Efendi b. Hüseyin meclis-i şer‘-i şerîf-i enverde takrîr-i kelâm ve ta‘bîr ani’l-merâm edip li-ecli’t-tebennî ve terbiye işbu yedimde olan Bursa sancağında Aydıncık kasabası ahâlisinden tahmînen sekiz yaşında Şerîfe Emine’nin aslâ malı ve zâhirde münfak-ı şer‘îsi ve hâkimü’ş-şer‘den gayrı velîsi olmamağla sagīre-i mezbûre kıbel-i şer‘den sekiz guruşa bana îcâr ve ücreti sagīre-i mezbûrenin nafaka ve kisve ve sâir levâzım-ı zarûriyesine harc ü sarfa emir olunmak matlûbumdur dedikde hâl bi’l-cümle mukırr-ı merkūmun takrîr-i meşrûhu üzere olup zikri âtî meblağ dahi kadr-ı ma‘rûf idüğü zeyl-i vesîkada muharrerü’l-esâmî Müslimîn ihbârlarıyla zâhir ve mütehakkık olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīre-i mezbûreyi mezbûr Mustafa Vehbi Efendi’ye hizmet eylemek üzere târih-i kitâbdan beher mâh sekizer guruş ücret tesmiyesiyle îcâr ve teslîm ve ücret-i mezkûresinin ikişer guruşunu sagīre-i mezbûrenin vakt-i rüşdüne değin yedinde hıfz mâ‘adâ altışar guruşunu sagīre-i mezbûrenin nafaka ve kisvesine harc ü sarfa emir etmeğin mâ-vaka‘a [bi’t-taleb ketb olundu.] Fî 26 S sene [1]242 Şühûdü’l-hâl: Muhzır Ali Çelebi, Muhzır Emin Çelebi