Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 112 Hüküm no: 80 Orijinal metin no: [25a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yoseb v. Vartan’ın Harobsima’dan borç aldığını ikrar etmesi İdâne hücceti Mahmiye-i İstanbul’da Langa Yenikapısı kurbünde mütemekkin Yoseb v. Vartan zimmî meclis-i şer‘-i hatîr-i lâzımü’t-tevkīrde şahsı mu‘arrefe Harobsima bt. Sokas Nasrâniye muvâcehesinde ikrâr-ı tam ve takrîr-i kelâm edip mersûme Harobsima Nasrâniye bana malından bin beş yüz guruş ikrâz ve teslîm ben dahi yedinden iktirâz ve kabz etmemle meblağ-ı mezbûr ile semeni târih-i kitâbdan üç sene tamamına değin müeccel ve mev‘ûd olmak üzere yine mersûmenin malından ve yedinden iştirâ ve kabz eylediği bir hilâlî sâ‘at semeninden altı yüz yetmiş beş guruş ki ciheteyn-i mezkûreteynden cem‘an iki bin yüz yetmiş beş guruş vâcibü’l-edâ ve lâzımü’l-kazâ mersûme Harobsima Nasrâniyeye deynim olmağla ben deynim olan meblağ-ı mecmû‘-ı mezbûr mukābelesinde sandal Bezzâzistânı kapısı hâricinde Tarakçılar nâm mahâlde köşe başında bir kepenkli bir bâb terzi dükkânı derûnunda mevcûd beyne’l-esnâf gedik ta‘bîr olunur bir destgâh ve bir mikrâs ve bir endâze ve sâir âlât-ı lâzıme-i ma‘lûmemi mersûme Harobsima Nasrâniyeye rehin vaz‘ ü teslîm eylediğimde ol dahi ber-vech-i muharrer irtihân ve kabz ü kabûl eyledikden sonra âlât-ı muharrere-i mezkûreyi mersûme Harobsima Nasrâniye li-ecli’l-isti‘mâl bana i‘âre ve teslîm, ben dahi isti‘âre ve kabz etmemle âlât-ı muharrere-i mezkûre hâlâ yedimde âriyettir dedikde gıbbe’t-tasdîki’ş-şer‘î mâ-vaka‘a [bi’t-taleb ketb olundu.] Fî 7 Ra sene [1]242 Şühûdü’l-hâl: Muhzır Hüseyin Çelebi, Muhzır Emin Çelebi, Muhzır Ali Çelebi, Bünyad v. Ohannes, Kirkor v. Adam