Bab Mahkemesi 54 Numaralı Sicil (H. 1102 / M. 1691) cilt: 20, sayfa: 123 Hüküm no: 106 Orijinal metin no: [17a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eski adı Fâtıma olan Şahbaz’ın aslen hür olduğu İşbu orta boylu çatık kaşlı kara gözlü hâmiletü’l-vesîka mukaddemâ Fâtıma tesmiye olunan Şahbaz nâm bikr-i bâliğa meclis-i [şer‘-i] şerîf-i enverde, kendiye rık olmak üzre vaz‘-ı yed eden İbrahim b. Mustafa mahzarında üzerine da‘vâ ve takrîr-i kelâm edip, ben vilâyet-i Rumeli’nde Vidin kasabası sâkinelerinden olup hürretü’l-asl iken mezbûr İbrahim Beşe bana rık olmak üzre vaz‘-ı yed eder, suâl olunup üzerimden yed-i mubtılasının kasr ve izâlesine tenbîh ve sebîlim tahliye olunmak matlûbumdur dedikde, gıbbe’s-suâl mezkûr İbrahim Beşe cevâbında, ben müdde‘iye-i mezkûreyi işbu hâzır bi’l-meclis Haffâf İbrahim Çelebi b. Hasan nâm kimesneden câriye-i memlûkesi olmak üzre otuz beş yaldız altını semen-i medfû‘a iştirâ etmekle vaz‘-ı yed ederim, müdde‘iye-i mezbûrenin ber vech-i muharrer hürretü’l-asl olduğu ma‘lûmum değildir deyicek, müdde‘iye-i mezkûreden müdde‘âsına beyyine taleb olundukda, udûl-i müslimînden olup hazret-i Ebâ Eyyûb el-Ensârî’de Baba Haydar mahallesi sükkânından fahrü’l-akrân Osman Çavuş b. Ebûbekir ve İbrahim Çelebi b. Mehmed nâm kimesneler li ecli’ş-şehâde meclis-i şer‘a hâzırân olup isre’l-istişhâd, fi’l-hakīka işbu müdde‘iye-i mezbûre kasaba-i mezkûre sâkinelerinden olup, hürretü’l-asldır. Biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye eylediklerinde, gıbbe’t-ta‘dîl ve’t-tezkiye şehâdetleri makbûle olmağın, mûcebiyle müdde‘iye-i mezbûrenin hürriyetine ba‘de’l-hükm, müdde‘iye-i mezkûrenin üzerinden mezbûr İbrahim Beşe’nin [b. Mustafa’nın] yed-i mubtılasının kasr ve izâlesine tenbîh olunup sebîli tahliye olunmağın, mâ vaka‘a bi’t-taleb ketb olundu. Fi’s-selhi min Cemâziyelevvel sene 1102. Şuhûdü’l-hâl: İbrahim Çelebi b. Ahmed, ve diğer İbrahim b. Mehmed, Mehmed Çelebi b. İbrahim ve gayruhüm.