Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 113 Hüküm no: 81 Orijinal metin no: [25a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Abdullah’ın, Tatar Mahmud Ağa’da olan hizmetkârlık ücretini tahsil etmesi Ücretden ibrâ yine îcâr. Mahrûse-i Galata hâricinde Beyoğlu nâm <> mahal ahâlisinden olup bundan akdem şeref-i İslâm ile müşerref olan Hasan b. Abdullah nâm bâliğ meclis-i şer‘-i şerîf-i enverde işbu bâ‘isü’l-vesîka Tatar Mahmud Ağa b. Ahmed mahzarında ikrâr-ı tam ve takrîr-i kelâm edip ben ücret ile hizmet eder makūlesinden olup bundan akdem hâl-i sugrumda merkūm Mahmud Ağa’ya ücret kavilsiz dört sene hizmet etmemle müddet-i mezkûrede eylediğim hizmetim için ecr-i mislim mukābelesinde merkūm Mahmud Ağa malından beher mâh ikişer guruş ile bir şalî entari ve bir şalvar ve bir salta marka ve bir baş yemenisi ve bir yemeni ve bir kuşağı bana def‘ ü teslîm ben dahi yedinden tamamen ahz ü kabz edip müddet-i mezkûrede eylediğim hizmetim için ziyâde ecr-i misil mutâlebesine müte‘allika da‘vâdan gerek merkūm Mahmud Ağa’nın ve gerek zevcesi hâzıra bi’l-meclis Hadice Hatun’un zimmetlerini ibrâ ve iskāt eylediğimden mâ‘adâben yine târih-i kitâbdan beher şehr üçer guruş ücret tesmiyesiyle nefsimi merkūm Mahmud Ağa’ya îcâr ve teslîm ol dahi ber-vech-i muharrer istîcâr ve kabûl eyledi dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 6 Ra sene [1]242 Şühûdü’l-hâl: Muhzır Ebûbekir Çelebi, Muhzır Mehmed Çelebi el-muhzır, Muhzır Genç Mehmed Çelebi, Muhzır Mehmed Çelebi